अकोट उपविभागातील सर्व पोलिस ठाणे हद्दीत दारू, गुटखा, जुगार, मटका, गांजा व इतर अवैध धंदे खुलेआम सुरू असल्याबाबतचे वृत्त दैनिक ‘दिव्य मराठी’ने १८ जानेवारीला प्रसिद्ध करण्यात आले होते. याची दखल घेत पोलिस अधीक्षक अर्चित चांडक यांनी अकोट उपविभागीय पोलिस अधिकाऱ्यांना लेखी आदेश देत कठोर कारवाईचे निर्देश दिले आहेत. अकोट उपविभागातील सर्व पोलिस ठाण्यांच्या ठाणेदारांना अवैध दारू विक्री, गुटखा, जुगार व अंमली पदार्थांविरोधात ‘प्रहार’ मोहिमेंतर्गत कडक कारवाई करण्याचे स्पष्ट आदेश देण्यात आले आहेत. कोणतीही कुचराई किंवा दुर्लक्ष सहन केले जाणार नसल्याचा इशारा वरिष्ठ स्तरावरून देण्यात आला आहे. दैनिक ‘दिव्य मराठी’सोबत बोलताना पोलिस अधीक्षक अर्चित चांडक यांनी सांगितले की, उपविभागीय पोलिस अधिकाऱ्यांना अवैध धंद्यांवर कडक कारवाई करण्याचे लेखी आदेश दिले आहेत. कोठेही अवैध धंदे सुरू असल्यास माहिती द्यावी, तेथे कारवाई केली जाणार, असे पोलिस अधीक्षकांनी सांगितले. नागरिकांनी अशा धंद्यांची माहिती थेट पोलिस प्रशासनाकडे किंवा माझ्याकडे द्यावी. माहिती देणाऱ्यांची ओळख पूर्णतः गुप्त ठेवली जाईल, असेही पोलिस अधीक्षक अर्चित चांडक यांनी सांगितले आहे.
पोलिस प्रशासनाने घेतली वृत्ताची दखल:अकोट उपविभागात अवैध धंद्यांविरोधात एसपी चांडक यांचे कारवाईचे आदेश
