मुंबै बँक एम्प्लॉईज युनियनच्या मुंबई बँक युनिट निवडणुकीत भाजप समर्थित कै. दीपक चंदगडकर स्मृती पॅनलने एकतर्फी विजय मिळवला आहे. या निवडणुकीत शिवसेना (एकनाथ शिंदे गट) नेते आनंदराव अडसूळ यांच्या नेतृत्वाखालील पॅनलला मोठ्या पराभवाला सामोरे जावे लागले. अडसूळ यांच्या पॅनलला एकही जागा जिंकता आली नाही. कै. दीपक चंदगडकर स्मृती पॅनलने 15 पैकी सर्व 15 जागांवर विजय मिळवत मुंबै बँकेतील आपले वर्चस्व कायम ठेवले. आमदार प्रवीण दरेकर, शिवाजीराव नलावडे, सिद्धार्थ कांबळे, नंदकुमार काटकर आणि प्रसाद लाड यांच्या मार्गदर्शनाखाली या पॅनलने निवडणूक लढवली होती. अडसूळ यांच्या पॅनलचा एकही उमेदवार विजयी नाही मुंबै बँकेवरील वर्चस्वासाठी यंदाची निवडणूक महत्त्वाची मानली जात होती. एकनाथ शिंदे यांच्या शिवसेनेने आनंदराव अडसूळ यांच्या नेतृत्वाखाली पॅनल मैदानात उतरवले होते. मात्र, मतदारांनी या पॅनलला पूर्णपणे नाकारल्याचे निकालातून स्पष्ट झाले आहे. अडसूळ यांच्या पॅनलमधील एकाही उमेदवाराला विजय मिळवता आला नाही. दुसरीकडे, कै. दीपक चंदगडकर स्मृती पॅनलने सर्व जागा जिंकत निवडणुकीत निर्विवाद वर्चस्व मिळवले. दरेकर समर्थित पॅनलचा पुन्हा मोठा विजय आमदार प्रवीण दरेकर यांचे मुंबै बँकेवर यापूर्वीपासूनच वर्चस्व राहिले आहे. यापूर्वी 2021 मध्ये झालेल्या निवडणुकीत दरेकर यांच्या नेतृत्वाखालील ‘सहकार पॅनल’ने सर्व 21 जागा जिंकल्या होत्या. त्यामुळे बँकेवरील सत्ता कायम ठेवण्यात दरेकर गटाला यश आले होते. यावेळीही दरेकर समर्थित पॅनलने सर्वच्या सर्व 15 जागा जिंकत आपली पकड कायम ठेवली आहे. त्यामुळे मुंबै बँकेच्या कारभारातील दरेकर यांच्या गटाचे वर्चस्व पुन्हा एकदा अधोरेखित झाले आहे. ठाणे बँकेतील यशानंतर शिवसेनेने उभे केले होते पॅनल ठाणे जिल्हा मध्यवर्ती सहकारी बँकेच्या निवडणुकीत एकनाथ शिंदे यांच्या नेतृत्वाखालील शिवसेनेला यश मिळाले होते. त्यानंतर मुंबै बँकेच्या निवडणुकीतही पक्षाने ताकदीने उतरण्याचा निर्णय घेतला होता. आनंदराव अडसूळ यांच्या नेतृत्वाखाली शिवसेनेने स्वतंत्र पॅनल उभे केले. त्यामुळे ही निवडणूक भाजप समर्थित दरेकर गट आणि शिवसेना समर्थित अडसूळ गट यांच्यातील महत्त्वाची लढत मानली जात होती. मात्र, निकालानंतर अडसूळ यांच्या पॅनलचा एकही उमेदवार विजयी झाला नसल्याने शिवसेनेला मोठा धक्का बसला आहे. मुंबै बँकेवरील सत्ता कायम मुंबै बँकेच्या या निवडणुकीत दरेकर समर्थित पॅनलने सर्व 15 जागा जिंकल्याने बँकेवरील विद्यमान सत्ताकेंद्र कायम राहणार आहे. आमदार प्रवीण दरेकर यांच्यासोबत आमदार प्रसाद लाड हे देखील बँकेच्या संचालक मंडळाशी संबंधित आहेत. त्यामुळे या निकालाकडे मुंबईतील सहकार क्षेत्रातील राजकीय समीकरणांच्या दृष्टीनेही पाहिले जात आहे. एकीकडे ठाणे जिल्हा मध्यवर्ती सहकारी बँकेत शिवसेनेला मिळालेले यश, तर दुसरीकडे मुंबै बँकेत अडसूळ यांच्या पॅनलचा झालेला पराभव, यामुळे सहकार क्षेत्रातील दोन्ही पक्षांच्या प्रभावाबाबत पुन्हा चर्चा सुरू झाली आहे. हेही वाचा… प्रदीप पूर्णेकर हत्या प्रकरणात कुटुंबीय आक्रमक:SIT स्थापन, 2 DCP, 2 ACP सह विशेष अधिकाऱ्यांचा तपासात समावेश ठाण्यातील शिवसेना (उद्धव बाळासाहेब ठाकरे) पक्षाचे विभागप्रमुख प्रदीप ऊर्फ बाळू पूर्णेकर यांची मंगळवारी रात्री गोळ्या झाडून आणि धारदार शस्त्राने हल्ला करून हत्या करण्यात आली. या घटनेमुळे ठाण्याच्या राजकीय वर्तुळात मोठी खळबळ उडाली आहे. मानपाडा परिसरातील क्लस्टर डेव्हलपमेंट आणि राजकीय वर्चस्वाच्या वादातून ही हत्या झाल्याचा संशय व्यक्त केला जात आहे. दरम्यान, पूर्णेकर कुटुंबीयांनी ठाण्याच्या माजी महापौर मीनाक्षी शिंदे आणि त्यांचे पती राजेंद्र शिंदे यांच्यावर हत्येचे सूत्रधार असल्याचा गंभीर आरोप केला आहे. सविस्तर वाचा…