शहरात मागील काही दिवसांपासून भटक्या आणि पिसाळलेल्या कुत्र्यांचा सुळसुळाट झाला आहे. लहान मुले तसेच ज्येष्ठ नागरिकांवर हल्ले होण्याच्या आणि कुत्र्यांनी चावा घेतल्याच्या घटनांमध्ये वाढ होत आहे. या समस्येवर तोडगा काढण्यासाठी व कुत्रे पकडण्यासाठी कायमस्वरूपी उपाययोजना करण्याच्या दृष्टीने आयुक्त यशवंत डांगे यांनी कोंडवाडा विभागाच्या मदतीला अग्निशमन दलाला पाचारण करण्याचा निर्णय घेतला आहे. हिंस्र आणि मोकाट कुत्री पकडण्यासाठी अग्निशमन दलाचे पथक नियुक्त केले जाणार आहे. आवश्यकतेनुसार हे पथक २४x७ कार्यवाही करणार आहे. सध्या कोंडवाडा विभागाकडे नियमित ‘अ‍ॅनिमल बर्थ कंट्रोल’ कार्यक्रम चालवण्यासाठी ठेकेदार संस्थेचे केवळ एकच डॉग कॅचिंग पथक कार्यरत आहे. मात्र, वाढत्या घटनांमुळे महापालिकेची कायमस्वरूपी स्थायी स्वरूपाची व्यवस्था निर्माण करणे आवश्यक असल्याने हा निर्णय घेण्यात आला आहे. अग्निशमन विभागाकडे आवश्यक यंत्रणा, पुरेसे मनुष्यबळ आणि आपत्कालीन परिस्थिती हाताळण्याचा प्रदीर्घ अनुभव असल्याने, त्यांच्या अखत्यारीतील कर्मचाऱ्यांचे एक विशेष पथक आवश्यकतेनुसार कार्यवाही करणार आहे. कुत्रे चावल्याच्या घटनेची तात्काळ दखल घेऊन, नागरिकांचा चावा घेणाऱ्या व पिसाळलेल्या कुत्र्यांना पकडण्याची कारवाई अग्निशमन दलाचे पथक करणार आहे. दरवर्षी निर्बीजीकरण होऊनही मोकाट कुत्र्यांची संख्या वाढतेय शहरात सध्या सुमारे २५ हजार मोकाट कुत्री असल्याचा अंदाज महापालिकेने व्यक्त केला आहे. या वाढत्या संख्येवर नियंत्रण मिळवण्यासाठी चालू वर्षात आतापर्यंत सुमारे ६२०० कुत्र्यांची निर्बीजीकरण शस्त्रक्रिया करण्यात आली आहे. विशेष म्हणजे यापूर्वीही वर्षानुवर्षे महापालिकेकडून निर्बीजीकरणाची ही प्रक्रिया सातत्याने राबवली गेली होती. एवढ्या मोठ्या प्रमाणावर शस्त्रक्रिया होऊनही शहरातील मोकाट कुत्र्यांची संख्या कमी होताना दिसत नाही. त्यामुळे शहराबाहेरून म्हणजेच लगतच्या ग्रामीण भागातून मोठ्या प्रमाणावर मोकाट कुत्री आणून रात्रीच्या वेळी शहरात सोडली जात असल्याचा संशय बळावला आहे. निर्बीजीकरण केंद्रामध्ये आणखी एक डॉग शेल्टर शहरातून पकडण्यात आलेल्या मोकाट कुत्र्यांची रवानगी करण्यासाठी पिंपळगाव माळवी येथील निर्बीजीकरण केंद्रात सद्यस्थितीत डॉग शेल्टर उभारण्यात आले आहे. मात्र, कुत्र्यांची सातत्याने वाढणारी संख्या आणि त्यांच्या निवाऱ्याची गरज लक्षात घेता, महापालिकेकडून याच ठिकाणी आणखी एक डॉग शेल्टर उभारण्याचे नियोजन करण्यात आले आहे. या नव्या डॉग शेल्टरसाठी ७० लाख रुपयांचा खर्च अपेक्षित असून, लवकरच याचे काम पूर्ण होणार आहे. यामुळे नव्याने पकडलेल्या कुत्र्यांना ठेवण्यासाठी व्यवस्था उपलब्ध होणार आहे.