औंढा नागनाथ पंचायत समितीमधील गैरव्यवहार प्रकरणात गटविकास अधिकाऱ्यावर पुढील दोन दिवसांत गुन्हा दाखल करा अन्यथा शिवसेना स्टाईल आंदोलन करण्याचा इशारा ठाकरे गटाच्या पदाधिकाऱ्यांनी गुरुवारी ता. २२ जिल्हा परिषद प्रशासनाकडे निवेदनाद्वारे दिला आहे. औंढा नागनाथ पंचायत समिती गैरव्यवहार प्रकरणात कर्मचाऱ्यांवर कारवाई झाली आहे. मात्र या प्रकरणात दोषी असलेल्या गटविकास अधिकाऱ्यावर कुठल्याही प्रकारची कारवाई झाली नाही. त्यामुळे लेखा विभागाच्या कार्यपध्दतीबद्दल शंका व्यक्त होत आहे. प्रशासनाकडून गटविकास अधिकाऱ्याला पाठिशी घातले जात असल्याचा आरोप केला जात आहे. या प्रकरणात शिवसेना ठाकरे गटाचे जिल्हा प्रमुख संदेश देशमुख, तालुका प्रमुख माऊली झटे, सुनील काळे, अनिल कदम, बाळासाहेब मगर, गणेश शिंदे, डॉ. पार्डीकर, भानुदास जाधव, शंकर घुगे, विठ्ठल चौतमल, चंद्रशेखर उबाळे, रवी पुप्पालू, विशाल यादव यांच्यासह पदाधिकारी व कार्यकर्त्यांनी आज दुपारी जिल्हा परिषद कार्यालय गाठले. मात्र यावेळी एकही अधिकारी उपस्थित नसल्याने तिव्र नाराजी व्यक्त करण्यात आली. मात्र अधिकारी दौऱ्यावर असल्याचे समजल्या नंतर पदाधिकाऱ्यांनी मुख्य लेखा व वित्त अधिकारी दिगंबर माडे यांची भेट घेतली. औंढा नागनाथ पंचायत समिती कार्यालयात गैरव्यवहार प्रकरणात दोषींवर कारवाई करण्यात आली आहे. मात्र अद्यापही त्यांच्यावर गुन्हे दाखल झालेले नाही. या प्रकरणात गटविकास अधिकारी गोपाल कल्हारे हे देखील दोषी असून त्यांच्यावरही गुन्हा दाखल करावा अशी मागणी पदाधिकाऱ्यांनी केली. पुढील दोन दिवसांत गुन्हे दाखल न झाल्यास शिवसेना स्टाईल आंदोलन करण्याचा इशारा देण्यात आला. या शिवाय कल्हारे यांनी शिवसेना तालुका प्रमुख माऊली झटे यांच्यावर दाखल केलेला खोटा गुन्हा त्वरीत मागे घेण्याची मागणीही करण्यात आली आहे.
औंढ्याच्या गटविकास अधिकाऱ्यावर गुन्हा दाखल करा:दोन दिवसांचा अल्टीमेटम, अन्यथा शिवसेना स्टाईल आंदोलन करण्याचा ठाकरे गटाचा इशारा
