हळदी-कुंकवातून 25 हजार ‘एकल’ महिलांचे सक्षमीकरण:गडचिरोली जिल्हा प्रशासन, जिल्हा परिषद व ‘उमेद’चा पुढाकार

समाजातील रूढी-परंपरांमुळे अनेकदा उपेक्षित ठरणाऱ्या एकल, विधवा व परित्यक्त्या महिलांना सन्मानाचे स्थान देत त्यांना मुख्य प्रवाहात आणण्यासाठी गडचिरोली जिल्हा प्रशासनाने मकरसंक्रांतीच्या निमित्ताने ‘हळदी-कुंकू’ उपक्रमाच्या माध्यमातून एक नवे सामाजिक पर्व सुरू केले आहे. सामाजिक समावेशकतेचा संदेश देणारा हा उपक्रम महिलांच्या सर्वांगीण सक्षमीकरणाला दिशा देणारा आहे. सामान्यतः एकल अथवा विधवा महिलांना समाज हळदी-कुंकवाच्या कार्यक्रमांपासून दूर ठेवतो. त्यांना मंगलमय धार्मिक कार्यक्रमात सहभागी होता येत नाही. अशा एकल महिलांसाठी प्रशासनाने जाणीवपूर्वक जिल्हाभर हळदी-कुंकू मेळाव्यांचे आयोजन करून त्यांच्या आत्मसन्मानाला नवे बळ दिले आहे. या माध्यमातून सण-उत्सवांच्या आनंदात त्यांचा सन्मानपूर्वक सहभाग निश्चित करण्यात आला. एकाच छताखाली समन्वय जिल्हाधिकारी अविश्यांत पंडा यांच्या मार्गदर्शनाखाली व जिल्हा परिषदेचे मुख्य कार्यकारी अधिकारी सुहास गाडे यांच्या संकल्पनेतून या उपक्रमाची अंमलबजावणी करण्यात येत आहे. यामध्ये जिल्हा परिषद, महिला व बालविकास विभागंातर्गत हा उपक्रम राबवण्यात आला. २५ हजार महिलांचे सर्वेक्षण गडचिरोली जिल्ह्यात एकूण २५,७३२ एकल महिला असल्याचे निदर्शनास आले आहे. या सर्व महिलांना शासनाच्या विविध कल्याणकारी योजनांचा थेट लाभ मिळावा यासाठी प्रशासनाने सुनियोजित कृती आराखड्याची अंमलबजावणी करण्यास सुरुवात केली आहे. उमेद अभियानांतर्गत कार्यभांडवल, समुदाय गुंतवणूक निधी व बँक लिंकेजद्वारे स्वयंरोजगारासाठी साहाय्य, संजय गांधी निराधार योजना व इतर माहिती देण्यात आली. मेळाव्यात धनादेशांचे वाटप समाजकल्याण सभागृह, गडचिरोली येथे नुकत्याच झालेल्या गडचिरोली तालुक्यातील मेळाव्यात स्मिता चौधरी, बहिणाबाई आत्राम, विमल मडावी व शशिकला दुमाने या एकल महिलांना त्यांच्या व्यवसायासाठी प्रत्येकी एक लाख रुपयांचे धनादेश प्रदान करण्यात आले.