हिंगोली पालिकेची पहिली सर्व साधारण सभा शुक्रवारी ता. १६ रोजी होणार असून उपनगराध्यक्षपदाची तिळगुळ कोणाला मिळणार याची उत्सूकता राजकिय वर्तुळाला लागली आहे. तर दुसरीकडे कळमनुरीत शिंदेसेनेचे शिवराज पाटील यांची उपनगराध्यक्षपदी वर्णी लागणार असल्याचे स्पष्ट
.
हिंगोली, कळमनुरी पालिकेवर शिंदेसेनेचे आमदार संतोष बांगर यांच्या नेतृत्वात शिंदेसेनेची एकहाती सत्ता आली असून वसमत येथे राष्ट्रवादीचे आमदार राजेश नवघरे यांनी राष्ट्रवादीने आपली ताकद दाखवून देत पालिकेवर राष्ट्रवादीचा झेंडा फडकविला आहे. त्यानंतर आता पालिकेमध्ये उपनगराध्यक्षपदी कोणाची वर्णी लागणार तसेच स्विकृत सदस्य पदी कोणाची निवड करायची याबाबत राजकिय हालचाली गतीमान झाल्या होत्या.
दरम्यान, कळमनुरी पालिकेची पहिली सर्वसाधारण सभा मंगळवारी ता. १३ नगराध्यक्षा आश्लेषा चौधरी यांच्या अध्यक्षतेखाली होणार आहे. यासभेत उपनगराध्यक्षपदी शिवराज पाटील यांची निवड होण्याचे संकेत आहेत. या शिवाय स्विकृत सदस्यासाठी शिंदेसेनेचे १३ व राष्ट्रवादीचे चार असे सदस्य सोबत घेतले जाणार असून या ठिकाणी शिंदेसेनेचे दोन स्विकृत सदस्य होणार आहेत. त्यासाठी बबलू पत्की, आयाज पठाण यांची निवड निश्चित मानली जात असून आमदार संतोष बांगर यांनी या नावांना हिरवा कंदील दाखविल्याचे सुत्रांनी सांगितले.
या सोबतच हिंगोली पालिकेची सर्वसाधारण सभा नगराध्यक्षा रेखा बांगर यांच्या उपस्थितीत शुक्रवारी ता. १६ होणार आहे. यावेळी उपनगराध्यक्षांची निवड केली जाणार आहे. पालिकेत शिंदेसेनेचे १७ नगरसेवक असून राष्ट्रवादीचे (अजित पवारगट) १०, भाजपा पाच तर काँग्रेसचे दोन सदस्य आहेत. त्यामुळे या ठिकाणीही आमदार बांगर कोणाच्या नावाला पसंती देणार याकडे राजकिय वर्तुळाचे लक्ष लागले आहे. मात्र त्यानंतरही उपनगराध्यक्षपदासाठी माबूद बागवान यांचेच नांव आघाडीवर आहे. तर स्विकृत सदस्यपदासाठी अनिल नेनवाणी, बापुराव बांगर यांचे नांव आघाडीवर आहे.
वसमत नगर पालिकेची सर्वसाधारण सभा गुरुवारी ता. १५ नगराध्यक्षा सुनीता बाहेती यांच्या अध्यक्षतेखाली होणार आहे. या पालिकेत राष्ट्रवादीचे १६, काँग्रेस ४, भाजपा ४, शिंदेसेना २, ठाकरेगट २ व इतर दोन असे संख्या बळ आहे. उपनगराध्यक्षपदासाठी आमदार राजेश नवघरे कोणाला पसंती देतात याकडे तालुक्याचे लक्ष लागले आहे.
