राज्यातील 29 महापालिका निवडणुकांच्या प्रचाराचा धुरळा आता अंतिम टप्प्यात पोहोचला असून, निवडणूक आयोगाची ईव्हीएमसह सर्व प्रशासकीय तयारी पूर्ण झाली आहे. मतदानाचा टक्का वाढवण्यासाठी आणि नागरिकांना आपला हक्क बजावता यावा यासाठी राज्य सरकारने 15 जानेवारी रोज
.
15 जानेवारी 2026 रोजी मतदान प्रक्रिया पार पडणार आहे. या पार्श्वभूमीवर मतदारांना आपला मतदानाचा हक्क सुलभतेने बजावता यावा, यासाठी राज्य शासनाने संबंधित निवडणूक क्षेत्रांमध्ये सार्वजनिक सुट्टी जाहीर केली आहे. या निर्णयाबाबतची अधिकृत अधिसूचना राज्य शासनाकडून प्रसिद्ध करण्यात आली असून, निवडणुकीच्या दिवशी सर्वत्र सुट्टीचे आदेश लागू करण्यात आले आहेत.
ही अधिसूचना सर्व प्रशासकीय विभागांच्या नियंत्रणाखालील शासकीय व निमशासकीय कार्यालये, महामंडळे आणि मंडळांना कळवण्यात आली आहे. विशेष म्हणजे, जे मतदार संबंधित महानगरपालिका निवडणूक क्षेत्रातील रहिवासी आहेत, परंतु कामानिमित्त मतदारसंघाबाहेर कार्यरत आहेत, त्यांनाही या सार्वजनिक सुट्टीचा लाभ घेता येणार आहे. प्रशासनाचा हा निर्णय मतदानाचा टक्का वाढवण्यासाठी अत्यंत महत्त्वाचा मानला जात आहे.
महानगरपालिका क्षेत्रांतील केंद्रशासनाची कार्यालये, निमशासकीय कार्यालये, सार्वजनिक उपक्रम, बँका व तत्सम आस्थापनांनाही ही सार्वजनिक सुट्टी लागू राहील, असे अधिसूचनेत नमूद करण्यात आले आहे. सार्वजनिक सुट्टी लागू असलेल्या महानगरपालिकांमध्ये बृहन्मुंबई, ठाणे, नवी मुंबई, उल्हासनगर, कल्याण–डोंबिवली, भिवंडी–निजामपूर, मीरा–भाईंदर, वसई–विरार, पनवेल, नाशिक, मालेगाव, अहिल्यानगर, जळगाव, धुळे, पुणे, पिंपरी–चिंचवड, सोलापूर, कोल्हापूर, इचलकरंजी, सांगली–मिरज–कुपवाड, छत्रपती संभाजीनगर, नांदेड–वाघाळा, परभणी, जालना, लातूर, अमरावती, अकोला, नागपूर आणि चंद्रपूर यांचा समावेश आहे.दरम्यान, मतदारांनी मतदानासाठी लोकशाहीच्या उत्सवात सक्रिय सहभाग नोंदवावा, असे आवाहन प्रशासनाच्यावतीने करण्यात आले आहे.
