शास्त्रीनगर रुग्णालय मारहाण प्रकरण:शिंदे गटाचे माजी नगरसेवक रमेश म्हात्रे यांना अटक, विरोधकांच्या दबावानंतर अखेर कारवाई

कल्याण-डोंबिवली महानगरपालिकेच्या शास्त्रीनगर रुग्णालयात कर्तव्यावर असलेल्या महिला डॉक्टर आणि कर्मचाऱ्यांना झालेल्या मारहाणीच्या घटनेने संपूर्ण महाराष्ट्रात खळबळ उडवून दिली आहे. या घटनेचे सीसीटीव्ही फुटेज व्हायरल झाल्यानंतर विरोधकांनी सरकारवर सडकून टीका केली होती. आता या वाढत्या दबावानंतर, ज्यांच्यावर मारहाणीचा आणि धक्काबुक्कीचा मुख्य आरोप आहे, ते सत्ताधारी शिवसेना शिंदे गटाचे माजी नगरसेवक रमेश म्हात्रे यांना अटक करण्यात आली आहे. रमेश म्हात्रे यांना डोंबिवली येथील विष्णुनगर पोलिसांनी अटक केली आहे. त्यांच्यासह इतर चौघांना देखील पोलिसांनी अटक केली आहे. डोंबिवलीतील शास्त्रीनगर रुग्णालयात कर्तव्यावर असलेल्या दोन डॉक्टर, दोन परिचारिका आणि इतर कर्मचाऱ्यांना रमेश म्हात्रे यांच्याकडून झालेल्या मारहाणीचे तीव्र पडसाद उमटले आहेत. या गंभीर घटनेप्रकरणी गुन्हा दाखल झाल्यानंतर पोलिसांनी सुरुवातीला केवळ तीन जणांना अटक केली होती. मात्र विरोधकांनी या प्रकरणावरून तीव्र संताप व्यक्त करत कारवाईची मागणी लावून धरल्यानंतर, वाढत्या दबावामुळे अखेर मुख्य आरोपी रमेश म्हात्रे यांनाही पोलिसांनी अटक केली आहे. शिंदे गटाचे डोंबिवली पश्चिमेकडील कोपर परिसरातील माजी नगरसेवक रमेश म्हात्रे यांनी आपल्या समर्थकांसह गुंडांसारखी मारहाण केल्याची धक्कादायक घटना घडली होती. या प्रकरणी पोलिसांनी गांभीर्याने दखल घेत रीतसर गुन्हा दाखल केला आणि तत्काळ कारवाई करत रमेश लक्ष्मण पवार (वय 50, रा. वडारवाडी, डोंबिवली पश्चिम), प्रकाश उद्धव निकम (वय 35, रा. सुंदरा आई आर्केड, कोपर रोड, डोंबिवली पश्चिम) आणि अक्षय शरद कारंडे (वय 30, रा. कलम श्री सोसायटी, कोपर क्रॉस रोड) या तीन आरोपींना अटक केली आहे. या संदर्भातील या देखील बातम्या वाचा शिंदेंच्या माजी नगरसेवकाची महिला डॉक्टर अन् नर्सला मारहाण:कल्याणमधील संतापजनक प्रकार, घटनेचे CCTV फुटेज व्हायरल कल्याण-डोंबिवली महानगरपालिकेच्या शास्त्रीनगर रुग्णालयामध्ये एक अत्यंत धक्कादायक आणि संतापजनक प्रकार समोर आला आहे. रुग्णालयातील एका महिला डॉक्टर, नर्स आणि सुरक्षा कर्मचाऱ्यांना थेट मारहाण आणि धक्काबुक्की करण्यात आली आहे. विशेष म्हणजे, सत्ताधारी शिवसेना (शिंदे गट) पक्षाचे माजी नगरसेवक रमेश म्हात्रे आणि त्यांच्या काही कार्यकर्त्यांवर या मारहाणीचा गंभीर आरोप करण्यात आला असून, या घटनेचे खळबळजनक सीसीटीव्ही फुटेजही समोर आले आहे. या घटनेमुळे वैद्यकीय क्षेत्रातील डॉक्टर आणि आरोग्य कर्मचाऱ्यांच्या सुरक्षेचा प्रश्न पुन्हा एकदा ऐरणीवर आला आहे. वाचा सविस्तर कल्याण रुग्णालय प्रकरण:रमेश म्हात्रे म्हणाले, ‘महिला डॉक्टरला मारहाण नाही’, रुग्णाची आई म्हणाली, ‘बाहेर पूर आणि डॉक्टर म्हणाले सायनला न्या!’ कल्याण मारहाण प्रकरण:श्रीकांत शिंदेंचे कठोर कारवाईचे आदेश; गुंडांची चड्डी-बनियानवर धिंड काढा, संजय राऊतांचा संताप