पुणे शहरातील जंगली महाराज रस्त्यावर एका पादचाऱ्याचा ७० हजार रुपयांचा मोबाईल हिसकावून पसार झालेल्या चोरट्याला गुन्हे शाखेने २४ तासांच्या आत अटक केली आहे. पोलिसांनी आरोपीकडून महागडा मोबाईल आणि दुचाकीसह १ लाख ३५ हजार रुपयांचा मुद्देमाल जप्त केला.
.
राकेश गोवर्धन वाघिरे (वय २५, रा. महात्मा गांधी वसाहत, पाटील इस्टेट, मुंबई-पुणे रस्ता) असे अटक करण्यात आलेल्या आरोपीचे नाव आहे.
या प्रकरणी शिवाजीनगर पोलीस ठाण्यात फिर्याद दाखल करण्यात आली होती. तक्रारदार ४ जानेवारी रोजी रात्री साडेदहाच्या सुमारास जंगली महाराज रस्त्यावर ॲप-आधारित प्रवासी वाहतूक करणाऱ्या मोटारचालकाची वाट पाहत थांबले होते. जंगली महाराज मंदिरासमोर दुचाकीस्वार आरोपी वाघिरे याने त्यांच्याकडील मोबाईल हिसकावून पळ काढला होता.
शिवाजीनगर पोलीस ठाण्यात गुन्हा दाखल झाल्यानंतर गुन्हे शाखेच्या युनिट एकने समांतर तपास सुरू केला. पोलीस कर्मचारी सुहास डोंगरे आणि युवराज कांबळे यांनी सीसीटीव्ही फुटेज तपासले आणि चोरट्याचा माग काढण्यास सुरुवात केली. तपासात आरोपी मुंबई-पुणे रस्त्यावरील पाटील इस्टेट परिसरात राहत असल्याची माहिती समोर आली.
आरोपी वाघिरे शिवाजीनगर रेल्वे स्थानक परिसरात येणार असल्याची माहिती मिळाल्यानंतर पोलिसांनी सापळा रचून त्याला पकडले. त्याच्याकडून हिसकावलेला मोबाईल आणि गुन्ह्यात वापरलेली दुचाकी असा एकूण १ लाख ३५ हजार रुपयांचा मुद्देमाल जप्त करण्यात आला.
पोलीस उपायुक्त निखिल पिंगळे आणि सहायक आयुक्त विजय कुंभार यांच्या मार्गदर्शनाखाली पोलीस निरीक्षक अजित जाधव, उपनिरीक्षक राहुल मखरे, सुहास डोंगरे, युवराज कांबळे, हेमंत पेरणे, निलेश साबळे आणि संदेश काकडे यांच्या पथकाने ही कामगिरी केली.
