‘बजाज पुणे ग्रँड टूर- २०२६’ या आंतरराष्ट्रीय स्पर्धेच्या मार्गावर संपूर्ण स्वच्छता राखण्यासाठी जिल्हाधिकारी जितेंद्र डुडी यांनी आवाहन केले आहे. ही स्पर्धा तसेच स्पर्धेच्या मार्गावरील गावांचे दूरचित्रवाणीद्वारे जागतिक पातळीवर थेट प्रक्षेपण होणार असल्य
.
प्रशासनाने स्थानिकांना विश्वासात घेऊन सूक्ष्म नियोजन करावे, असे आवाहन जिल्हाधिकाऱ्यांनी केले. प्रशासनासोबत स्थानिक लोकप्रतिनिधी, नागरिक, गृहनिर्माण सोसायटी व गणेश मंडळाचे पदाधिकारी, महाविद्यालये, राष्ट्रीय छात्र सेना (NCC) आणि राष्ट्रीय सेवा योजनेचे (NSS) विद्यार्थी या सर्व घटकांनी मिळून मोहीमस्तरावर स्वच्छता मोहीम राबवावी, असेही ते म्हणाले.
जिल्हाधिकाऱ्यांनी ‘बजाज पुणे ग्रँड टूर- २०२६’ च्या टप्पा-२ च्या अनुषंगाने संपूर्ण स्पर्धा मार्गावरील गावनिहाय पाहणी केली आणि नागरिकांशी संवाद साधला, त्यावेळी ते बोलत होते. यावेळी आमदार शंकर मांडेकर, अपर पोलीस अधीक्षक गणेश बिरादार, हवेलीचे प्रांताधिकारी यशवंत माने, पुरंदरच्या वर्षा लांडगे, भोर वेल्हाचे विकास खरात, सार्वजनिक बांधकाम विभागाचे अधीक्षक अभियंता भरतकुमार बाविस्कर, कार्यकारी अभियंता अनुराधा भंडारे, जिल्हा नियोजन अधिकारी किरण इंदलकर, जिल्हा क्रीडा अधिकारी जगन्नाथ लकडे, पुणे शहरचे तहसीलदार अर्चना निकम, पुरंदरचे विक्रम राजपुत, वेल्हा श्रीनिवास ढाणे आणि ‘बजाज पुणे ग्रँड टूर’चे तांत्रिक सल्लागार पिनाकी बायसक आदी उपस्थित होते.
जिल्हाधिकारी डुडी म्हणाले की, आंतरराष्ट्रीय दर्जाच्या या स्पर्धेचे महत्त्व लक्षात घेता प्रशासनाच्या वतीने गुणवत्तापूर्ण आणि दर्जेदार रस्ते तयार करण्यात आले आहेत. या स्पर्धेच्या माध्यमातून आपल्या गाव आणि परिसरातील नैसर्गिक सौंदर्य, पर्यटनस्थळे आणि शिवकालीन इतिहास जगभर पोहोचवण्याची संधी आहे. या टप्प्यांतर्गत येणाऱ्या गावांमध्ये खेळाडू आल्यास स्वयंशिस्त पाळत महाराष्ट्राचा इतिहास, संस्कृती, संगीत, वेशभूषा, नाटक, पथनाट्य आणि लोकनाट्य आदी माध्यमांद्वारे त्यांचे स्वागत करावे.
स्पर्धेवेळी येथील ग्रामस्थ आणि नागरिकांनी स्पर्धेच्या मार्गावर बाजूला उभे राहून खेळाडूंचा उत्साह वाढवावा. असे करताना स्पर्धेला अडथळा निर्माण होणार नाही याची दक्षता घ्यावी. तसेच, मार्गावर पाळीव प्राणी येऊ नयेत, याबाबत सर्व संबंधितांनी दक्षता घ्यावी, असे निर्देशही त्यांनी दिले.
ही स्पर्धा केवळ महाराष्ट्राची नव्हे, तर देशातील सर्वात मोठी स्पर्धा असणार आहे. या स्पर्धेच्या माध्यमातून पुणे जिल्ह्याचा इतिहास पुढे येणार असून एक नवीन इतिहास जगासमोर आणण्याचा प्रयत्न करण्यात येत आहे. सर्वांनी एकत्रित होऊन मोठे काम होऊ शकते हे दाखवून देऊ, असा विश्वास व्यक्त करत प्रशासनासोबत स्पर्धा यशस्वी करण्यासाठी नागरिकांनी सहकार्य करावे, असे आवाहनही डुडी यांनी केले.
आमदार मांडेकर यांनी सांगितले की, ‘बजाज पुणे ग्रँड टूर’ ही आंतरराष्ट्रीय दर्जाची स्पर्धा जिल्ह्यात होत असून याद्वारे पर्यटनास चालना मिळणार आहे. त्यादृष्टीने प्रशासन अहोरात्र काम करत आहे.
