Chhatrapati Sambhajinagar Saree Offer Stampede Women Shopping Chaos | संभाजीनगरमध्ये ऑफर्समुळे चेंगराचेंगरी: 5000 ची साडी 599 रुपयांत खरेदीसाठी महिलांची झुंबड; 3 जणी बेशुद्ध, दुकान तातडीने बंद – Chhatrapati Sambhajinagar News

.

त्रिमूर्ती रोडवरील या नवीन साडी सेंटरचे रविवारी उद्घाटन होते. गेल्या ३ महिन्यांपासून स्थानिक रीलस्टार्समार्फत १९९ ते ५९९ रुपयांमधील साड्यांचे व्हिडिओ सोशल मीडियावर व्हायरल केले जात होते. सकाळी १० वाजेपासूनच महिलांच्या रांगा लागल्या होत्या. ११ वाजता उद्घाटन होऊन दुकान उघडताच महिलांनी आत शिरण्यासाठी एकच गर्दी केली. काही वेळातच रस्ता पूर्णपणे जाम झाला आणि परिस्थिती नियंत्रणाबाहेर गेली.

पोलिसांचा हस्तक्षेप, लाऊडस्पीकरवरून आवाहन

दुकानात महिलांना श्वास घेण्यास त्रास होऊ लागल्याने स्थानिक नागरिकांनी पोलिसांना कळवले. जवाहरनगर पोलीस ठाण्याचे निरीक्षक सचिन कुंभार यांनी तातडीने पथकासह धाव घेतली. गर्दी पांगवण्यासाठी पोलिसांनी माईकचा वापर केला. “ही ऑफर केवळ आजपुरती नसून ३६५ दिवस राहणार आहे,’ असे जाहीर केल्यानंतर आणि बळाचा वापर करण्याचा इशारा दिल्यानंतर दुपारी २ वाजता ही गर्दी निवळली.

अनुचित प्रकार टाळला- सचिन कुंभार, पोलिस निरीक्षक

गर्दीमुळे महिलांना श्वास घेण्यास अडथळा येत होता. संभाव्य मोठी चेंगराचेंगरी टाळण्यासाठी आम्ही तात्काळ दुकान बंद करण्यास लावले आणि महिलांना सुरक्षित बाहेर काढले.

अपेक्षेपेक्षा जास्त प्रतिसाद- कृष्णा देशमुख, दुकान मालक

आम्ही रीतसर परवानगी घेतली होती, पण एकाच वेळी १ हजार महिला येतील अशी अपेक्षा नव्हती. ही सवलत वर्षभर सुरू राहणार असल्याने महिलांनी गर्दी करू नये.