राज्यातील 23 नगरपरिषदा आणि नगरपंचायतींसह विविध जिल्ह्यांतील एकूण 143 सदस्यपदांसाठी आज मतदान प्रक्रिया सुरू आहे. सकाळी 7.30 वाजल्यापासून राज्यभरातील मतदान केंद्रांवर मतदारांनी मोठ्या प्रमाणावर गर्दी केली असून लोकशाहीच्या या महत्त्वाच्या प्रक्रियेत नाग
.
अंबरनाथ नगरपरिषदेच्या निवडणुकीदरम्यान कोहोजगाव परिसरातून समोर आलेल्या घटनेमुळे राजकीय वर्तुळात खळबळ उडाली आहे. येथे एका सभागृहात शेकडो महिलांची गर्दी जमल्याचे सकाळच्या सुमारास आढळून आले. या महिलांना बोगस मतदानासाठी आणण्यात आल्याचा आरोप काही राजकीय पक्षांनी केला आहे. मतदान सुरू असतानाच हा प्रकार उघडकीस आल्यानंतर काँग्रेस आणि भाजपच्या कार्यकर्त्यांनी घटनास्थळी धाव घेतली. या महिलांची उपस्थिती संशयास्पद असल्याचा आरोप करत कार्यकर्त्यांनी तीव्र आक्षेप नोंदवला. परिस्थिती तणावपूर्ण बनल्याने परिसरात मोठा गोंधळ निर्माण झाला आणि वातावरण चांगलेच तापले.
या प्रकरणात काँग्रेस आणि भाजपच्या कार्यकर्त्यांनी थेट प्रतिस्पर्धी उमेदवारांवर आरोप केले आहेत. काँग्रेसच्या कार्यकर्त्यांनी असा दावा केला की, या महिलांना बोगस मतदानासाठीच कोहोजगावमधील सभागृहात एकत्र करण्यात आले होते. या गोंधळाची माहिती पोलिसांना देण्यात आल्यानंतर पोलिसांनी तात्काळ घटनास्थळी दाखल होत परिस्थिती नियंत्रणात आणण्याचा प्रयत्न केला. पोलिसांनी सभागृहातील महिलांना बाहेर काढत त्यांची चौकशी सुरू केली आहे. या महिला नेमक्या कुठून आल्या, त्यांचा मतदानाशी काय संबंध होता आणि त्या खरंच बोगस मतदानासाठी आणल्या होत्या का, याचा तपास सध्या सुरू आहे. या संपूर्ण घटनेमुळे मतदानाच्या पारदर्शकतेवर प्रश्नचिन्ह निर्माण झाले आहे.
प्रभाग क्रमांक 28 मध्ये पैसे वाटपाचा आरोप
दरम्यान, अंबरनाथ नगरपरिषदेच्या निवडणुकीत आणखी एक गंभीर प्रकार समोर आला आहे. शहरातील प्रभाग क्रमांक 28 मध्ये मतदानाच्या पार्श्वभूमीवर पैसे वाटपाचा आरोप झाला आहे. राष्ट्रवादी काँग्रेसच्या अजित पवार गटाच्या कार्यकर्त्यांनी दोन जणांना पैशांची पाकीटे वाटताना रंगेहाथ पकडल्याचा दावा केला आहे. या दोघांना तात्काळ भरारी पथकाच्या ताब्यात देण्यात आले असून पोलिसांनी घटनास्थळी पोहोचत पुढील कारवाई सुरू केली आहे. भाजपच्या उमेदवाराकडून मतदारांना पैसे वाटले जात असल्याचा गंभीर आरोप राष्ट्रवादी काँग्रेसच्या कार्यकर्त्यांनी केला आहे. या प्रकरणामुळे निवडणूक आचारसंहितेच्या उल्लंघनाचा मुद्दा पुन्हा एकदा ऐरणीवर आला आहे.
अंबरनाथ नगरपरिषदेची निवडणूक अत्यंत वादग्रस्त ठरली
या दोन वेगवेगळ्या घटनांमुळे अंबरनाथ नगरपरिषदेची निवडणूक अत्यंत वादग्रस्त ठरली आहे. एकीकडे बोगस मतदारांचा आरोप तर दुसरीकडे मतदारांना पैसे वाटपाचा संशय, यामुळे संपूर्ण निवडणूक प्रक्रियेवर सावली पडली आहे. पोलिस आणि निवडणूक यंत्रणा सतर्क असून परिस्थिती नियंत्रणात ठेवण्यासाठी कडेकोट बंदोबस्त तैनात करण्यात आला आहे. निवडणूक आयोगाकडून या दोन्ही प्रकरणांचा सविस्तर अहवाल मागवला जाण्याची शक्यता असून दोषींवर कठोर कारवाई होण्याचे संकेत दिले जात आहेत. दरम्यान, मतदान प्रक्रिया सुरूच असून प्रशासनाकडून शांततेत आणि पारदर्शक पद्धतीने निवडणूक पार पाडण्याचे आवाहन करण्यात आले आहे.
