Maharashtra Weather Update | पुढील 48 तास महत्त्वाचे! हवामान विभागाने दिला ‘हा’ इशारा

Maharashtra Weather Update | गेल्या काही आठवड्यांपासून महाराष्ट्रावर अवकाळी पावसाचे संकट कायम होते. अनेक जिल्ह्यांमध्ये अचानक झालेल्या वादळी पावसामुळे शेतीसह घरांचे आणि रस्त्यांचे मोठे नुकसान झाले. मात्र आता राज्यातील हवामानात काहीसा बदल दिसून येत असून वातावरण हळूहळू स्थिर होत आहे. आज 8 एप्रिल रोजी राज्यातील बहुतांश भागांत हवामान कोरडे आणि उन्हाळी राहण्याचा अंदाज व्यक्त करण्यात आला आहे.

सध्या अवकाळी पावसाचा जोर कमी झाला असला तरी हवामान खात्याने पुढील 48 तास महत्त्वाचे असल्याचे सांगितले आहे. तापमानात वाढ होत असून काही भागांत उष्णतेची लाट जाणवू शकते. त्यामुळे नागरिकांनी उन्हाळ्याच्या पार्श्वभूमीवर आवश्यक ती खबरदारी घेण्याचे आवाहन करण्यात आले आहे.

मुंबईसह कोकण किनारपट्टीत गेल्या काही दिवसांत अवकाळी पावसाने नागरिकांची चिंता वाढवली होती. मात्र आता या भागात पावसाचा धोका कमी झाला असून हवामान कोरडे आणि दमट राहण्याची शक्यता आहे. कमाल तापमान 31 ते 35 अंश सेल्सियसच्या दरम्यान राहण्याचा अंदाज आहे. पुढील काही दिवसांत तापमानात 2 ते 3 अंशांनी वाढ होऊ शकते. दमट वातावरणामुळे विशेषतः लहान मुले आणि ज्येष्ठ नागरिकांना अस्वस्थता जाणवू शकते. (Maharashtra Weather Update)

मध्य महाराष्ट्रातही परिस्थिती जवळपास अशीच आहे. पुणे, सोलापूर आणि आसपासच्या जिल्ह्यांत अवकाळी पावसाचा प्रभाव कमी झाला असून आज हवामान कोरडे राहील. या भागात तापमान 32 ते 38 अंशांपर्यंत पोहोचू शकते. मात्र 9 एप्रिल रोजी सोलापूर आणि सांगली परिसरात हलक्या पावसाची शक्यता वर्तवण्यात आली आहे, त्यामुळे शेतकऱ्यांनी सावध राहण्याची गरज आहे.

Maharashtra Weather Update | विदर्भ आणि मराठवाड्यात उष्णतेची शक्यता :

उत्तर महाराष्ट्रातही अवकाळी पावसाने माघार घेतली आहे. नाशिकसह या भागातील जिल्ह्यांत सध्या कोणताही विशेष हवामान इशारा देण्यात आलेला नाही. मात्र तापमानात वाढ होत असून कमाल तापमान 38 अंशांपर्यंत जाऊ शकते. उन्हाचा तडाखा लक्षात घेता नागरिकांनी पुरेसे पाणी पिणे आणि सावलीत राहणे आवश्यक असल्याचे सांगितले जात आहे.

मराठवाडा आणि विदर्भातही परिस्थिती काहीशी अशीच आहे. लातूरसह मराठवाड्यातील काही भागांत 9 एप्रिल रोजी पुन्हा हलक्या पावसाची शक्यता आहे. विदर्भात गेल्या काही दिवसांत वादळी पावसामुळे मोठे नुकसान झाले होते, परंतु आता हवामान स्थिर होत आहे. मात्र तापमान 36 ते 41 अंशांपर्यंत पोहोचण्याची शक्यता असल्याने उष्णतेची लाट जाणवू शकते.