शिंदे-ठाकरे गट आमनेसामने, टेंभी नाक्यावर शक्तिप्रदर्शन:आदित्य ठाकरे आणि संजय राऊत यांनी घेतली पूर्णेकर कुटुंबीयांची भेट; ठाण्यातील राजकीय वातावरण तापले

प्रदीप पूर्णेकर यांच्या हत्या प्रकरणावरून ठाण्यातील राजकीय वातावरण चांगलेच तापले आहे. या प्रकरणावरून शिवसेनेच्या एकनाथ शिंदे गट आणि उद्धव ठाकरे गटाचे कार्यकर्ते आमनेसामने आल्याचे चित्र पाहायला मिळत आहे. टेंभी नाका येथे शिंदे गटाच्या शिवसेनेकडून शक्तिप्रदर्शन करण्यात येत असून, पक्षाचे पदाधिकारी आणि कार्यकर्ते मोठ्या संख्येने जमण्यास सुरुवात झाली आहे. दुसरीकडे, ठाकरे गटाचे नेते आदित्य ठाकरे आणि खासदार संजय राऊत यांनी प्रदीप पूर्णेकर यांच्या कुटुंबीयांची भेट घेतली. या भेटीनंतर ते पत्रकार परिषदेत कोणती भूमिका मांडतात, याकडे राजकीय वर्तुळाचे लक्ष लागले आहे. प्रदीप पूर्णेकर हत्या प्रकरणामुळे ठाण्यात शिवसेनेच्या दोन्ही गटांमध्ये आरोप-प्रत्यारोप सुरू झाले आहेत. या प्रकरणात ठाकरेंच्या शिवसेनेकडून शिवसेनेच्या नेत्या आणि ठाण्याच्या माजी महापौर मीनाक्षी शिंदे तसेच राजेंद्र शिंदे यांच्या सहभागाबाबत आरोप करण्यात आल्याचे सांगितले जात आहे. संबंधितांवर कारवाई करून त्यांना अटक करण्याची मागणी ठाकरे गटाकडून करण्यात येत आहे. मात्र, या आरोपांची निष्पक्ष चौकशी होऊन सत्य समोर येणे आवश्यक आहे. टेंभी नाक्यावर शिंदेसेनेचे शक्तिप्रदर्शन हत्या प्रकरणाच्या पार्श्वभूमीवर शिंदे गटाच्या शिवसेनेकडून टेंभी नाका येथे शक्तिप्रदर्शन करण्यात येत आहे. शिवसेनेचे सचिव भाऊसाहेब चौधरी, खासदार नरेश म्हस्के यांच्यासह पक्षाचे अन्य पदाधिकारी या ठिकाणी उपस्थित आहेत. मुंबई, नवी मुंबई, ठाणे, पालघर आणि आसपासच्या भागांतून शिवसैनिक ठाण्यात दाखल होत असल्याचे चित्र आहे. आमदार, विभागप्रमुख आणि स्थानिक पदाधिकाऱ्यांच्या उपस्थितीमुळे परिसरात राजकीय हालचालींना वेग आला आहे. दुसरीकडे, पूर्णेकर कुटुंबीयांना न्याय मिळावा आणि प्रकरणातील आरोपींवर कारवाई व्हावी, या मागणीवरून ठाकरे गटाने आक्रमक भूमिका घेतली आहे. त्यामुळे ठाण्यातील राजकीय संघर्ष आणखी तीव्र होण्याची शक्यता व्यक्त केली जात आहे. दोन्ही गटांच्या कार्यकर्त्यांची जमवाजमव सुरू असल्याने पोलिसांसमोरही कायदा आणि सुव्यवस्था राखण्याचे आव्हान निर्माण झाले आहे. आरोपींना अटक होईपर्यंत आंदोलनाचा इशारा या प्रकरणाच्या पार्श्वभूमीवर माजी खासदार राजन विचारे यांनी पोलिस आयुक्तांची भेट घेत आपली भूमिका मांडली. आरोपींना अटक होत नाही, तोपर्यंत आंदोलन सुरूच ठेवणार, असा इशारा त्यांनी दिल्याचे सांगितले जात आहे. पूर्णेकर कुटुंबीयांना लवकरात लवकर न्याय मिळावा आणि या प्रकरणाची योग्य पद्धतीने चौकशी व्हावी, अशी मागणी करण्यात येत आहे. मनसेचे नेते अविनाश जाधव यांनीही या प्रकरणावरून ठाण्यातील परिस्थितीवर टीका केली आहे. पूर्णेकर कुटुंबीयांना न्याय मिळणे महत्त्वाचे असल्याची भूमिका मनसेकडून मांडण्यात आली आहे. त्यामुळे या प्रकरणावरून शिंदे गट, ठाकरे गट आणि मनसे यांच्यातील राजकीय संघर्षाला धार येताना दिसत आहे. मीनाक्षी शिंदेंचा महिला आघाडी प्रमुखपदाचा राजीनामा दरम्यान, या प्रकरणात आरोप होत असलेल्या मीनाक्षी शिंदे यांनी ठाणे जिल्हा महिला आघाडी प्रमुखपदाचा राजीनामा एकनाथ शिंदे यांच्याकडे सोपवल्याचे वृत्त समोर आले आहे. आपल्यावर होत असलेले आरोप दुर्दैवी असून, त्यामुळे पक्षालाही त्रास सहन करावा लागत आहे, असे त्यांनी म्हटल्याचे सांगितले जात आहे. आरोपांची निष्पक्ष चौकशी पूर्ण होईपर्यंत पदापासून दूर राहण्याची भूमिका त्यांनी घेतल्याचे वृत्त आहे. मीनाक्षी शिंदे यांच्या राजीनाम्यामुळे या प्रकरणाला आणखी राजकीय महत्त्व प्राप्त झाले आहे. एका बाजूला ठाकरे गटाकडून कारवाईची मागणी केली जात असताना, दुसऱ्या बाजूला शिंदे गटाकडून टेंभी नाका येथे शक्तिप्रदर्शन केले जात आहे. त्यामुळे या प्रकरणावरून शिवसेनेतील दोन्ही गटांमध्ये संघर्ष वाढण्याची चिन्हे आहेत. आदित्य ठाकरे, संजय राऊतांच्या पत्रकार परिषदेपूर्वी ठाणे शासकीय विश्रामगृहात शिंदेसेनेच्या कार्यकर्त्यांची गर्दी ठाणे शासकीय विश्रामगृहात आदित्य ठाकरे आणि संजय राऊत पत्रकार परिषदेसाठी येणार असल्याने शिंदेसेनेच्या कार्यकर्त्यांनी गर्दी केली आहे. प्रदीप पूर्णेकर हत्या प्रकरणावरून ठाण्यातील राजकीय वातावरण तापले असून, शिंदे आणि ठाकरे गट आमनेसामने आले आहेत. टेंभी नाका येथे शिंदेसेनेकडून शक्तिप्रदर्शन करण्यात आले. दरम्यान, आदित्य ठाकरे आणि संजय राऊत यांनी पूर्णेकर कुटुंबीयांची भेट घेतली आहे. या प्रकरणातील आरोपींना अटक करण्याची मागणी ठाकरे गटाकडून करण्यात येत आहे. या पार्श्वभूमीवर शासकीय विश्रामगृहातील पत्रकार परिषदेत आदित्य ठाकरे आणि संजय राऊत काय भूमिका मांडतात, याकडे सर्वांचे लक्ष लागले आहे. हेही वाचा…. आरोपांची निष्पक्ष चौकशी होईपर्यंत पदावर राहणार नाही:पूर्णेकर हत्याकांडाच्या वाढत्या दबावानंतर मिनाक्षी शिंदेंचा ठाणे जिल्हा महिला प्रमुखपदाचा राजीनामा ठाण्यातील शिवसेना (उद्धव बाळासाहेब ठाकरे) पक्षाचे मानपाडा विभागप्रमुख प्रदीप पूर्णेकर यांच्या निर्घृण हत्याकांडाने संपूर्ण महाराष्ट्राचे राजकारण ढवळून निघाले असतानाच, या प्रकरणात अत्यंत मोठी आणि नाट्यमय राजकीय घडामोड समोर आली आहे. पूर्णेकर यांच्या हत्येचा कट रचल्याचा थेट आरोप असलेल्या शिवसेनेच्या (शिंदे गट) मातब्बर नेत्या आणि माजी महापौर मिनाक्षी शिंदे यांनी अखेर आपल्या ठाणे जिल्हा महिला आघाडी प्रमुखपदाचा (महिला जिल्हा संघटक) राजीनामा दिला आहे. त्यांनी आपला राजीनामा पक्षाचे मुख्य नेते तथा उपमुख्यमंत्री एकनाथ शिंदे यांच्याकडे सुपूर्द केला असून, “माझ्यावरील आरोपांची निष्पक्ष चौकशी पूर्ण होईपर्यंत मी पदापासून दूर राहीन,” अशी भूमिका त्यांनी घेतल्याचे समजते. सविस्तर वाचा…..