खासदार संजय देशमुख यांच्या वाहनाला भीषण अपघात:यवतमाळमध्ये ट्रकने दिली कारला जोरदार धडक, साखरा गावाजवळ दुर्घटना
राज्यात अपघातांचे सत्र सुरू असतानाच, गुरुवारी यवतमाळच्या दिग्रस तालुक्यातील साखरा गावाजवळ शिवसेना ठाकरे गटाचे खासदार संजय देशमुख यांच्या वाहनाला एका ट्रकने जोरदार धडक दिल्याने भीषण अपघात झाला. या घटनेमुळे परिसरात एकच खळबळ उडाली असून, अपघातानंतर स्थानिक नागरिकांनी मदतीसाठी तातडीने घटनास्थळी धाव घेतली. मिळालेल्या माहितीनुसार, खासदार संजय देशमुख यांच्या वाहनाला यवतमाळच्या दिग्रस तालुक्यातील साखरा गावाजवळ भीषण अपघात झाला असून एका कार्यक्रमातून परतत असताना एका ट्रकने त्यांच्या कारला जोरदार धडक दिली. या धडकेत खासदारांच्या वाहनाचे प्रचंड नुकसान झाले असून अपघाताची ही घटना घडताच परिसरात मोठी खळबळ उडाली. सुदैवाने या भीषण अपघातातून खासदार संजय देशमुख थोडक्यात बचावले असून ते आता पूर्णपणे सुखरूप आहेत. या घटनेत त्यांना किरकोळ दुखापत झाली असून, अपघातानंतर त्यांनी तातडीने दिग्रस येथील एका खासगी रुग्णालयात जाऊन उपचार घेतले. त्यांच्या प्रकृतीला कोणताही धोका नसल्याची माहिती समोर आल्याने त्यांच्या समर्थकांनी आणि कुटुंबीयांनी सुटकेचा निश्वास सोडला आहे. अपघाताची बातमी समजताच स्थानिक नागरिकांनी मदतीसाठी घटनास्थळी मोठी गर्दी केली होती, ज्यामुळे रस्त्याच्या दोन्ही बाजूंनी काही काळ वाहतूक कोंडी निर्माण झाली होती. मात्र, पोलिसांनी तातडीने धाव घेत जमावाला पांगवले आणि रस्ता वाहतुकीसाठी मोकळा करून दिला. या अपघातात खासदारांव्यतिरिक्त इतर कोणाला गंभीर दुखापत झाली आहे का, याचा सविस्तर तपशील मिळवण्याचे काम अद्याप सुरू आहे.
वार्ताहार/प्रतिनिधी
