‘घरोघरी हवाच शिवबा’ गीताचे लोकार्पण:संगीताच्या माध्यमातून शिवविचारांचा जागर, स्वरोपासना ग्लोबल म्युझिक अकॅडमी व गीत फुलोरा यांची निर्मिती

शिवजयंतीचे औचित्य साधून वाकड आणि पुनावळे येथील स्वरोपासना ग्लोबल म्युझिक अकॅडमी आणि गीत फुलोरा निर्मित ‘घरोघरी हवाच शिवबा’ या प्रेरणादायी गीताचे नुकतेच दिमाखदार विमोचन करण्यात आले. वाकड येथील वेस्टर्न अव्हेन्यू सोसायटीच्या शिवजयंती उत्सवात हा सोहळा पार पडला. प्रत्येक घरात छत्रपती शिवाजी महाराजांचे विचार पोहचावेत, हा या गीताचा मुख्य उद्देश आहे. “दान मागते आयाबायांनो, देशासाठी पुन्हा एकदा… घरोघरी हवाच शिवबा, पुन्हा नव्याने पुन्हा एकदा…” या ओळींनी सजलेले हे प्रेरणादायी गीत कवी शब्दाभिषेकी श्याम खांबेकर यांनी लिहिले आहे. अभय–अर्पिता यांनी संगीतबद्ध केले असून अथर्व यांनी संगीत संयोजनाची जबाबदारी सांभाळली आहे. गायन अर्पिता आणि भाग्यदा यांनी केले आहे. मान्यवरांच्या हस्ते लोकार्पण विक्रम कुलकर्णी, सुगंधाताई शिरवळकर, आनंद दीक्षित, राहुल वाळंके, सचिन बोर्डे आणि पूनम पाटील यांच्या हस्ते गीताचे लोकार्पण करण्यात आले. यावेळी गीताचे सादरीकरणही करण्यात आले. तालबद्ध शब्द आणि संगीताच्या सुरेल सादरीकरणाने उपस्थित शिवप्रेमींनी उत्स्फूर्त दाद दिली. विद्यार्थ्यांचा सहभाग स्वरोपासना ग्लोबल म्युझिक अकॅडमीचे विद्यार्थी ओंकार, योगेंद्र, कृतिका, श्रिया, मिताली, अमेय, आरती, कल्पा, पुष्पलता, मीनल, ऋतुजा, वैष्णवी आणि राकेश यांनी सहगायनातून कार्यक्रमात रंग भरला. वेस्टर्न एव्हेन्यू सोसायटीचे सुशील घारे, संतोष मोरे, नवनाथ पवार, सुधाकर दिवाण, सुमित काळे आणि प्रदीपकुमार गडगे आदी मान्यवर उपस्थित होते. ‘शिवविचार घराघरात’चा संदेश या गीतातून प्रत्येक घरात शिवाजी महाराजांचे विचार रुजले पाहिजेत, असा संदेश देण्यात आला आहे. कार्यक्रमानंतर मान्यवरांनी हे गीत काळाची गरज असल्याचे मत व्यक्त करत निर्मितीबद्दल समाधान व्यक्त केले. शिवाजी महाराजांचे विचार शब्द आणि संगीताच्या माध्यमातून पुढे नेण्याचा प्रयत्न कौतुकास्पद असल्याचे त्यांनी नमूद केले. ‘घरोघरी हवाच शिवबा’ हे गीत ‘geetfulora’ या यूट्यूब चॅनलवर उपलब्ध असून सर्वांनी ते ऐकावे, असे आवाहन संगीतकार–गायक अभयार्पिता यांनी केले.