खानापुरात सुहास बाबरांचा 'करेक्ट कार्यक्रम':भाजपचा सुपडासाफ, शिवसेनेचा भगवा फडकला; विजयानंतर ठोकला शड्डू

मुख्यमंत्र्यांना जाऊन विचार, मी कोण आहे. माझ्यासारखे 242 आमदार आहेत म्हणून तुझा मुख्यमंत्री बसला आहे, अशा शब्दांत भाजपला शिवसेना शिंदे गटाचे आमदार सुहास बाबर यांनी आव्हान दिले होते. तसेच मुख्यमंत्र्यांचा एकेरी उल्लेख केला होता. आता याच सुहास बाबर यांनी आपला गड राखत भाजपचा सुपडासाफ केल्याचे पाहायला मिळत आहे. खानापुरातल्या जिल्हा परिषदेच्या चारही जागा आणि पंचायत समितीच्या आठही जागा शिवसेना शिंदे गटाने जिंकल्या असून भाजपला इथे एकही जागा मिळू शकली नाही. सांगलीच्या नागेवाडी जिल्हा परिषद गटातून आमदार सुहास बाबर यांच्या वहिनी, शिवसेनेच्या उमेदवार डॉ. शीतल बाबर या विजयी झाल्या आहेत. खानापूर तालुक्यात शिवसेनेला यश मिळाल्यानंतर आमदार सुहास बाबर यांनी शड्डू ठोकल्याचे पाहायला मिळाले. खानापूर विधानसभा मतदारसंघाच्या निवडणूक प्रचारात भाजपच्या स्थानिक नेत्यांशी थेट भिडणारे आमदार सुहास बाबर यांनी निकालात आपली सरशी कायम राखत राजकीय वर्चस्व सिद्ध केले आहे. प्रचारादरम्यान खानापुरात दोन्ही राष्ट्रवादी, दोन्ही शिवसेना आणि काँग्रेस आपणच चालवतो, अशा शब्दांत भाजप नेत्यांना दिलेला दम आणि मुख्यमंत्री देवेंद्र फडणवीस यांचे नाव घेत दिलेला इशारा, या सर्वांवर त्यांच्या विजयाने आता शिक्कामोर्तब केल्याचे दिसून येत आहे. मावळमध्ये अजित पवारांच्या राष्ट्रवादीचा डंका!:विजयानंतर सुनील शेळकेंचे डोळे पाणावले मावळ जिल्हा परिषद आणि पंचायत समितीच्या 2026 च्या निवडणुकीत आमदार सुनील शेळके यांच्या नेतृत्वाखाली अजित पवार यांच्या राष्ट्रवादी काँग्रेसने सर्व 5 जिल्हा परिषद आणि 10 पंचायत समिती जागांवर घवघवीत यश मिळवले आहे. या विजयानंतर कौतुक करायला अजित पवार हयात नसल्याने सुनील शेळके भावूक झाल्याचे पाहायला मिळाले. वाचा सविस्तर