हजुरी खालसा दिवाणचे नवीन विश्र्वस्त मंडळ उपधर्मदाय आयुक्तांनी मंजुर केले
नांदेड(प्रतिनिधी)-सन 1902 म्हणजे मुस्लीम वर्ष 1312 फसलीपासून सुरू असलेल्या हजुरी खालसा दिवाण या बद्दल नांदेड परिक्षेत्राच्या सहाय्यक धर्मदाय आयुक्त ममता राखाडे यांनी एक महत्वपुर्ण निर्णय दिला असून त्यामध्ये सन 2020 मध्ये दाखल करण्यात आलेल्या नवीन योजनेला मंजुरी दिली आहे आणि आपल्यावतीने एक धार्मिक व्यक्तीला या योजनेत सदस्य करून घेण्यास सांगितले आहे. ही योजना वेगवेगळ्या कारणांनी चर्चेत होती पण आता त्याचा निकाल लागला आहे.
गुरुद्वारा सचखंड श्री हजुर साहिब अगोदर निजाम सरकारच्या राज्यात होते. त्यावेळी 1902 पासून गुरुद्वारा बोर्डाचा प्रशासनिक कारभार पाहण्याची जबाबदारी हजुरी खालसा दिवाणच्यावतीने स्थापन करण्यात आलेली समिती पाहत होती. या हजुरी खालसा दिवाणची नोंदणी सन 1951 मध्ये हैद्राबाद येथे करण्यात आली होती. पुढे हैद्राबाद राज्य खालसा झाले आणि सचखंड श्री हजुर साहिब यांचा प्रशासकीय कारभार पाहण्यासाठी 1956 मध्ये गुरुद्वारा बोर्डाची स्थापना झाली आणि त्या गुरुद्वारा बोर्डात एकूण सदस्यांपैकी चार सदस्य हजुरी खालसा दिवाणचे घेण्याचे ठरले. असाच हा कारभार चालत राहिला. पुढे-पुढे या हजुरी खालसा दिवाणची मनमानी कारभार करण्याची पध्दत सुरू झाली. त्यानंतर सरदार मनजितसिंघ जगनसिंघ यांनी या संदर्भाने वेगवेगळे प्रश्न उपस्थित केले. त्यात सन 2020 मध्ये दिवाणने पाठविलेले गुरुद्वारा बोर्डातील चार सदस्य उच्च न्यायालयाने रद्द केले. या निकालात उच्च न्यायालयाने सांगितले होते की, हजुरी खालसा दिवाणच्या नियमावलीमध्ये सुधारणा करण्याची गरज आहे. उच्च न्यायालयाने दिलेला निकालच सर्वोच्च न्यायालयात कायम राहिला. त्यानंतर सरदार अमरजितसिंघ खेमसिंघ यांनी उपधर्मदाय आयुक्त कार्यालयाकडे शेड्युल 1 दाखल केले. त्यांचा तो अर्ज रद्द झाला. सहधर्मदाय आयुक्तांनी सुध्दा तो अर्ज रद्द केला. त्यानंतर सरदार मनजितसिंघ यांनी योजना अर्ज क्रमांक 498/2020 महाराष्ट्र पब्लिक ट्रस्ट कायदा 1950 च्या कलम 50-अ(1) प्रमाणे दाखल केली. त्यामध्ये दिवाणचे कामकाज कसे असेल दिवाणच्या सदस्यांची निवड कशी होईल. त्यांचे उद्देश काय असतील. त्यांचे वय काय असावे. त्यांनी काय काम करावे. त्यांच्या जबाबदाऱ्या काय आहेत अशी सविस्तर ही योजना होती.
योजना अर्ज क्रमांक 498 चा निकाल देतांना उपधर्मदाय आयुक्त ममता राखाडे यांनी सरदार मनजितसिंघ यांनी सादर केलेल्या योजनेला सुध्दा निकालाचा भाग आहे असे सांगितले. सोबतच या योजनेमध्ये असलेली दिवाणच्या सदस्यांची 28 नावे पुढील प्रमाणे आहेत. सरदार मनजितसिंघ जगनसिंघ हे प्रधान आहेत, सरदार गुलाबसिंघ चंदासिंघ हे सचिव आहेत, सरदार दर्शनसिंघ चरणसिंघ हे कोषाध्यक्ष आहेत, सरदार पविंदरसिंघ अमरसिंघ हे धार्मिक व्यक्ती आहेत आणि सदस्यांमध्ये स.नरेंद्रसिंघ गगनसिंघ, स.अमरजितसिंघ खेमसिंघ, स.सुरजितसिंघ शेरसिंघ फौजी, स.राजासिंघ गुरबचनसिंघ फौजी, स.सतपालसिंघ गिल, स.ओमकारसिंघ रामसिंघ, स.उत्तमसिंघ रामसिंघ, स.जगजीवनसिंघ त्रिलोकसिंघ रामगडीया, टहेलसिंघ गुरमुखसिंघ निर्मले, स.हरबन्ससिंघ शंकरसिंघ, स.गुरमितसिंघ किशनसिंघ, स.परविंदरसिंघ बक्षीसिंघ संधू, स.बिशनसिंघ बिरनसिंघ , स.त्रिलोकसिंघ करतारसिंघ साहु, स.संतोकसिंघ जोहरसिंघ बावरी, स.अजितसिंघ कनासिंघ, स.अवतारसिंघ रतनसिंघ गाडीवाले, स.शेरसिंघ मानसिंघ पुजारी, स.सुरजितसिंघ जीवनसिंघ गिरनीवाले, स.बलविंदरसिंघ मानसिंघ , स.महेंद्रपालसिंघ साबेरवाले अशी आहेत. उपधर्मदाय आयुक्त नांदेड यांनी या 28 सोबत एक धार्मिक व्यक्तीसुध्दा विश्र्वसंस्थेचा सदस्य असावा असे जोडले आहे. त्यामुळे या हजूरी खालसा दिवाण सदस्यांची संख्या 29 झाली आहे.
गुरुद्वारा बोर्डात सदस्य पाठविण्याचा अधिकार दिवाणकडे कायम आहे असे दिवाणचे प्रधान सरदार मनजितसिंघ यांनी वास्तव न्युज लाईव्हला सांगितले. एकंदरीतच अनेक कारणांनी या दिवाणची चर्चा नांदेडमध्ये नेहमीच होत होती आता त्यात नवीन योजनेसह सर्व सदस्य नव्याने जोडले गेले आहेत. नवीन नियमावली तयार झाली आहे. कार्यकारी सदस्य कसे निवडावेत, आजीवन सदस्य कसे व्हावे, प्रधान कसे बनावे या सर्वांची नियमावली तयार झाली आहे. तसेच उपधर्मदाय आयुक्तांनी या आदेशात लिहिले आहे की, नियमांच्या विषयी कोणाला काही शंका असेल तर त्यांनी उपधर्मदाय आयुक्त कार्यालयाशी संपर्क साधावा.
Post Views: 1
