आम्ही आमचा नेता गमावला:आमचे आयुष्य आता आधीसारखे नसणार, अजितदादांविषयी बोलताना अदिती तटकरे ढसा-ढसा रडल्या

उपमुख्यमंत्री अजित पवार यांच्या अकाली निधनामुळे राष्ट्रवादी काँग्रेस पक्षावर दुःखाचा डोंगर कोसळला असून, आपल्या या कणखर नेत्याला गमावल्याची भावना पक्षातील प्रत्येक नेत्याच्या मनात दाटून आली आहे. राज्याच्या महिला व बालविकास मंत्री आदिती तटकरे आपल्या भावना व्यक्त करताना अक्षरशः ढसा-ढसा रडल्याचे पाहायला मिळाले. एका वृत्तवाहिनीला बोलताना अदिती तटकरे भावुक झाल्याचे पाहायला मिळाल्या. त्या म्हणाल्या, आम्ही आमचा नेता गमावला. त्यांना परत बघता येणार नाही. हे कधीही न भरून निघणारे दुःख आहे. त्यांनी नेहमीच आम्हा सगळ्यांना पाठबळ दिले, आधार दिला. चांगले काम केले तर प्रशंसा करायचे. थोड्या कुठे चुका झाल्या तर हक्काने वडिलांसारखे ओरडायचे, मार्गदर्शन करायचे. एक दिवस असा गेला नाही की, दादांचे नाव तोंडातून निघाले नसेल. आम्ही यापुढे काम करत असताना प्रत्येक बाबतीत त्यांची आठवण येत राहील, असे म्हणताना तटकरेंना रडू कोसळले. पुढे बोलताना अदिती तटकरे म्हणाल्या, सगळ्या बाजूने दादांनी केलेल्या कामांचे कौतुक होत आहे. महाराष्ट्राने काय गमावले याबाबत सर्व बोलत आहेत आणि ते ऐकायला आज दादा नाहीत. त्यांनी नेहमीच भरभरुन प्रेम दिले. वडिलांचे जसे मार्गदर्शन मिळत आले, तसे त्यांचेही नेहमी मिळत आले. ते प्रोत्साहन देत राहिले. नेहमी तरुणांना, महिलांना, युवतींना संधी मिळाली पाहिजे, नवे नेतृत्व घडले पाहिजे हेच त्यांचे नेहमी असायचे. तुम्ही एखाद्या कार्यकर्त्याला कसे घडवायचे, त्याला ताकद कशी द्यायची, त्याला प्रशासकीय ज्ञान कसे द्यायचे, मला आठवते की, मी 2019 मध्ये आमदार झाले त्यावेळी पहिले भाषण कसे करायचे हे मी दादांकडून शिकले. अगदी बजेटचे मुद्दे कसे मांडायचे, पुरवणी मागण्या, भाग क्रमांक, पान क्रमांक बोलून कसे उठायचे, या सगळ्या गोष्टी त्यांनी शिकवल्या. सभागृह हे आधीसारखे नसणार आहे. आमच्या सगळ्यांचे आयुष्य सुद्धा त्यांच्याविना आधीसारखे नसरणार आहे, अशी भावनिक प्रतिक्रिया अदिती तटकरे यांनी दिली आहे. यावेळी प्रदेशाध्यक्ष सुनील तटकरे यांनी देखील प्रतिक्रिया दिली. ते म्हणाले, दादांच्या अकाली जाण्याने आम्ही सर्वजण मानसिकदृष्ट्या खचलेलो आहोत. त्यामुळे काही बोलण्याच्या मनःस्थितीत आमच्यापैकी कोणी नाही, अशी भावना सुनील तटकरे यांनी व्यक्त केली आहे.