जळगावमध्ये भीषण अपघात, आजोबांसह 6 वर्षीय नातवाचा जागीच मृत्यू:दुचाकी-ट्रॉली धडकेत दोन जीव गेले; गंभीर जखमी महिलेवर उपचार सुरू

राज्यातील महामार्गांवर अपघातांच्या घटनांमध्ये दिवसेंदिवस वाढ होत असून रस्ते सुरक्षेचा प्रश्न अधिकच गंभीर बनत चालला आहे. दररोज वर्तमानपत्रे आणि माध्यमांमधून भीषण अपघातांच्या बातम्या समोर येत असून त्या मन सुन्न करणाऱ्या आहेत. अशाच एका हृदय पिळवटून टाकणाऱ्या अपघाताची घटना जळगाव जिल्ह्यात घडली आहे. धरणगाव तालुक्यातील पाळधी परिसरात दुचाकी आणि भरधाव ट्रॅक्टर ट्रॉलीच्या भीषण धडकेत आजोबा आणि त्यांचा अवघ्या सहा वर्षांचा नातू जागीच ठार झाला. या अपघातात एक महिला गंभीर जखमी झाली असून तिच्यावर रुग्णालयात उपचार सुरू आहेत. ही दुर्दैवी घटना धरणगाव तालुक्यातील पाळधी गावातील बायपासवरील कढोली फाट्याजवळ घडली. देशमुख चुनीलाल राठोड हे आपली पत्नी बेबीबाई राठोड आणि नातू परेश राठोड यांच्यासोबत दुचाकीवरून प्रवास करत होते. नुकत्याच खरेदी केलेल्या कारच्या कागदपत्रांच्या कामासाठी ते जळगावला आले होते. काम पूर्ण करून तिघेही दुचाकीने आपल्या गावी परतत असताना समोरून येणाऱ्या भरधाव ट्रॅक्टर ट्रॉलीने त्यांच्या दुचाकीला जोरदार धडक दिली. धडकेचा जोर इतका भीषण होता की आजोबा आणि नातवाचा जागीच मृत्यू झाला. या अपघातात बेबीबाई राठोड या गंभीर जखमी झाल्या असून त्यांना तातडीने जळगाव येथील शासकीय वैद्यकीय महाविद्यालयात दाखल करण्यात आले आहे. डॉक्टरांच्या देखरेखीखाली त्यांच्यावर उपचार सुरू आहेत. अपघातानंतर ट्रॅक्टर ट्रॉलीचा चालक घटनास्थळावरून पळून जाण्याचा प्रयत्न करत असल्याची माहिती मिळाली. मात्र, पोलिसांनी तत्काळ कारवाई करत चालकाला ताब्यात घेतले असून ट्रॅक्टर ट्रॉलीसह त्याला पाळधी पोलिस ठाण्यात आणण्यात आले आहे. या प्रकरणी पुढील तपास सुरू आहे. अपघाताची माहिती मिळताच जळगाव जिल्हा रुग्णालयात नातेवाईक आणि गावकऱ्यांनी मोठी गर्दी केली होती. रुग्णालयाबाहेर कुटुंबीयांचा आक्रोश पाहून उपस्थितांचेही डोळे पाणावले. एका क्षणात संपूर्ण कुटुंब उद्ध्वस्त झाल्याचे दृश्य पाहून वातावरण अत्यंत भावनिक झाले होते. वाढत्या अपघातांच्या घटनांमुळे महामार्गावरील सुरक्षिततेचा प्रश्न पुन्हा एकदा ऐरणीवर आला असून प्रशासनाने याकडे गांभीर्याने लक्ष देण्याची मागणी नागरिकांकडून केली जात आहे.