डॉ. पंजाबराव देशमुख कृषी विद्यापीठात सुरू असलेल्या आपत्ती व्यवस्थापन तयारीपूर्व प्रशिक्षणाच्या सहाव्या दिवशी राज्यभरातील विद्यापीठांतून आलेल्या रासेयो स्वयंसेवकांना सहाय्यक कमांडर सारंग कुर्वे यांच्या मार्गदर्शनात आपत्ती व्यवस्थापनाचे धडे देण्यात आले. पहिल्या सत्रात उंच तथा अति उंच इमारतीत दुर्घटना घडल्यास नागरिकांचे जीव वाचवण्यासाठी करावयाच्या उपाययोजनांवर एनडीआरएफमार्फत व्याख्यानानंतर प्रात्यक्षिक घेण्यात आले. निरीक्षक ईश्वरदास मते, अजय यादव यांनी ही प्रात्यक्षिके घेतली. आपत्ती व्यवस्थापन शिबिर दिवस आव्हानाचा होता. यात आगीत अडकलेल्या व्यक्तींना वाचवण्याचे प्रात्यक्षिक घेण्यात आले. उंच इमारतीवरील या प्रात्यक्षिकांना अनन्यसाधारण महत्त्व आहे. खाईत पडलेल्यांना वाचवणे, बस अपघाताने दरीत कोसळल्यास दोराने व उपलब्ध संसाधनांचा उपयोग करत बचाव कार्य कसे राबवावे, याचे प्रात्यक्षिक घेतले. सुरुवातीला उंच इमारतीत बचाव कार्यालय उपयोगी साहित्याची ओळख करून देण्यात आली. यात बॉडी हारनेस, डबल रोप असेंडिंग, लहान मुलांचे बचाव, बेशुद्ध व्यक्तीला इमारतीवरून खाली आणणे, घाबरलेल्या व्यक्तीला खाली आणणे, टायगर लिफ्ट सीट हार्नेसचा वापर, रॅपलिंग पिगी बॅग कॅरी, कॅटवॉक, फ्रंट रॅपलिंग आदी प्रात्यक्षिके घेण्यात आली.
विद्यार्थ्यांनी घेतला इमारतीवरील बचाव कार्याचा थरारक अनुभव, राज्यभरातून आलेल्या विद्यार्थ्यांना दिले प्रात्यक्षिक
