मेघालय उच्च न्यायालयाच्या मुख्य न्यायाधीश न्यायमूर्ती रेवती मोहिते डेरे यांनी नुकतीच पुणे येथील सिंबायोसिस आंतरराष्ट्रीय विद्यापीठाला भेट दिली. यावेळी त्यांनी विद्यापीठांनी संविधानिक नैतिकतेचे पालन करणे आवश्यक असल्याचे प्रतिपादन केले. त्यांच्यासोबत ज्येष्ठ विधिज्ञ व माजी खासदार ॲड. वंदना चव्हाण उपस्थित होत्या. या भेटीदरम्यान न्यायमूर्ती डेरे यांनी सिंबायोसिसचे संस्थापक व अध्यक्ष तसेच विद्यापीठाचे कुलपती डॉ. शां. ब. मुजुमदार यांच्याशी संवाद साधला. तसेच, सिंबायोसिसच्या विविध घटक संस्थांचे संचालक आणि वरिष्ठ नेतृत्वाशीही त्यांनी सखोल चर्चा केली. न्यायमूर्ती डेरे यांनी उच्च शिक्षणाच्या माध्यमातून राष्ट्रनिर्मितीत सिंबायोसिसने दिलेल्या योगदानाचे कौतुक केले. विद्यापीठे केवळ शैक्षणिक ज्ञान देणारी केंद्रे नसून, संविधानिक मूल्ये, नैतिकता, समता आणि न्याय यांचे संस्कार रुजविणारी महत्त्वाची स्थळे आहेत, असे त्यांनी नमूद केले. “संविधानिक नैतिकतेचे पालन आणि प्रसार करण्यामध्ये विद्यापीठांची भूमिका अत्यंत मोलाची आहे,” असे त्या म्हणाल्या. त्यांनी युवकांमध्ये नैतिक नेतृत्व, सामाजिक जाणीव आणि कायद्याच्या राजवटीबद्दल आदर निर्माण करण्याची जबाबदारी शैक्षणिक संस्थांवर असल्याचे अधोरेखित केले. युवकांनी केवळ वैयक्तिक यशावर लक्ष केंद्रित न करता सहानुभूती, प्रामाणिकपणा आणि सामाजिक बांधिलकी जपावी, असे आवाहनही त्यांनी केले. शिक्षण अधिक न्याय्य व सर्वसमावेशक समाज घडविण्याचे प्रभावी साधन ठरू शकते, असा विश्वास त्यांनी व्यक्त केला. मान्यवरांचे स्वागत करताना डॉ. शां. ब. मुजुमदार यांनी सिंबायोसिसची दृष्टी आणि तत्त्वज्ञान स्पष्ट केले. “‘वसुधैव कुटुंबकम्’ या संकल्पनेवर सिंबायोसिसची स्थापना झाली असून, शिक्षणातून संवेदनशील, नैतिक आणि सामाजिकदृष्ट्या जबाबदार नागरिक घडविण्यावर आमचा भर आहे,” असे त्यांनी सांगितले. या भेटीदरम्यान कायदेविषयक जनजागृती, लिंग संवेदनशीलता तसेच समकालीन सामाजिक आव्हानांना सामोरे जाण्यात शैक्षणिक संस्थांची बदलती भूमिका यावरही चर्चा झाली. ॲड. वंदना चव्हाण यांनी शैक्षणिक संस्था, विधी क्षेत्र आणि धोरणकर्ते यांच्यात सातत्यपूर्ण संवादाची गरज अधोरेखित केली.
विद्यापीठांनी घटनात्मक नैतिकतेचे पालन करावे:न्यायमूर्ती रेवती मोहिते डेरे यांचे सिंबायोसिस भेटीदरम्यान प्रतिपादन
