अमरावतीत तिसरे अ. भा. एल्गार मराठी गजल संमेलन:7 आणि 8 फेब्रुवारी रोजी आयोजन

अमरावती येथे ७ आणि ८ फेब्रुवारी रोजी तिसरे अखिल भारतीय एल्गार मराठी गजल संमेलन आयोजित करण्यात आले आहे. या संमेलनात महाराष्ट्रातील दीडशेहून अधिक गजलकार सहभागी होणार आहेत. हे संमेलन येथील श्री. संत ज्ञानेश्वर सांस्कृतिक नाट्यगृहात पार पडेल. सुरेश भट प्रतिष्ठान आणि वसंतराव पालेकर प्रतिष्ठान यांनी या संमेलनाचे यजमानपद स्वीकारले आहे. प्रसिद्ध गजलकार सीए नाना लोडम यांची या संमेलनाच्या स्वागताध्यक्षपदी निवड करण्यात आली आहे. त्यांनी माध्यमांशी संवाद साधताना सांगितले की, प्रसिद्ध कवी व गजलकार वैभव जोशी हे संमेलनाचे अध्यक्ष असतील. मुंबईचे डॉ. राम पंडित यांच्या हस्ते संमेलनाचे उद्घाटन केले जाईल. या संमेलनात एकूण १३ मराठी गजल मुशायरे आयोजित करण्यात आले आहेत. याशिवाय, एक तरन्नूम मुशायरा, परिसंवाद आणि गजल गायन मैफिलही रंगणार आहे. संमेलनाध्यक्ष वैभव जोशी यांची ‘सोबतीचा करार’ ही विशेष मैफल देखील होणार असल्याचे लोडम यांनी स्पष्ट केले. यावेळी शाहीर सुरेशकुमार वैराळकर (पुणे), दगडू दादा लोमटे (अंबाजोगाई), संतोष बोरगावकर, डॉ. गणेश गायकवाड, शिवाजी जवरे आणि निवृत्त माहिती महासंचालक डॉ. दिलीप पांढरपट्टे यांसारखे अनेक मान्यवर उपस्थित राहणार आहेत. हे संमेलन अमरावती जिल्ह्याच्या इतिहासात एक महत्त्वाचा टप्पा ठरेल, असा विश्वास लोडम यांनी व्यक्त केला. संमेलनाच्या यशस्वी आयोजनासाठी एक समिती गठीत करण्यात आली आहे. यात स्वागताध्यक्ष नाना लोडम, प्रसिद्ध वऱ्हाडी कवी नितीन देशमुख, अनंत नांदुरकर-खलीश, नवोदित गजलकार नितीन भट, कवी संजय इंगळे तिगावकर यांचा समावेश आहे. सहसमन्वयक म्हणून संदीप देशमुख, मारुती मानमोडे, निलेश कवडे, अजिज खान पठाण आणि रेणुका पुरोहित हे जबाबदारी सांभाळत आहेत. अमरावती शहर हे विदर्भाची सांस्कृतिक राजधानी म्हणून ओळखले जाते आणि कविवर्य सुरेश भट यांची ही गृहनगरी आहे. या शहरात मराठी गजलेची एक समृद्ध मेजवानी रसिकांना मिळणार आहे. शंभर वर्षांपूर्वी विदर्भ साहित्य संघाची स्थापना याच शहरात झाली होती, तसेच प्रसिद्ध मराठी गजलकार भीमराव पांचाळे हे देखील याच जिल्ह्याचे रहिवासी आहेत.