Uddhav Raj Thackeray Hold Historic Joint Rally Shiv Tirth Over BMC Election | ठाकरे बंधुंची ऐतिहासिक सभा थोड्याच वेळात: शिवतीर्थावर शिवसैनिकांसह मनसैनिकांची गर्दी, सभेआधी राज यांनी घेतली उद्धव यांची भेट – Mumbai News

.

मुंबई महानगरपालिकेच्या सत्तेच्या चाव्या मिळवण्यासाठी ही ठाकरे बंधूंची एकत्र येण्याची वेळ अत्यंत सूचक मानली जात आहे. भाजप आणि शिंदे गटाच्या महायुतीसमोर मोठे आव्हान उभे करण्यासाठी उद्धव आणि राज ठाकरे यांनी एकत्र येणे हा ‘गेम चेंजर’ ठरू शकतो, असे राजकीय विश्लेषकांचे मत आहे. दोन्ही नेत्यांचे वक्तृत्व आणि त्यांच्या पाठीशी असलेली मराठी माणसाची ताकद यामुळे मुंबईतील राजकारणाला आता एक नवी दिशा मिळण्याचे संकेत मिळत आहेत. या सभेत दोन्ही नेते काय बोलणार आणि कोणावर निशाणा साधणार, याकडे राजकीय वर्तुळाचे डोळे लागले आहेत.

राज ठाकरे यांनी शिवसेनेतून बाहेर पडून मनसेची स्थापना केल्यानंतर गेल्या दोन दशकात दोन्ही भावांनी अनेक निवडणुका स्वतंत्रपणे लढवल्या. मात्र, बदलत्या राजकीय समीकरणांच्या पार्श्वभूमीवर मुंबई महापालिका निवडणुकीसाठी ही ऐतिहासिक ‘ठाकरे युती’ प्रत्यक्षात आली आहे. १९ वर्षांपूर्वी दोन्ही नेते एकाच राजकीय व्यासपीठावर शेवटचे दिसले होते. आज पुन्हा एकदा तेच दृश्य शिवतीर्थावर पाहायला मिळणार असल्याने कार्यकर्त्यांमध्ये कमालीचा उत्साह दिसून येत आहे. ही सभा केवळ राजकीय नसून ती भावनिकदृष्ट्याही शिवसैनिकांसाठी आणि मनसैनिकांसाठी अत्यंत महत्त्वाची मानली जात आहे.