PMPML Pune Bus | PMPML बस चालकांसाठी नवीन नियम; बस चोरीच्या घटनेनंतर कडक कारवाई

PMPML Pune Bus | पुणे (Pune) शहरातील सार्वजनिक प्रवासाची व्यवस्था अधिक सुरक्षित आणि पारदर्शक करण्यासाठी पीएमपी (PMPML) प्रशासनाने कठोर पावले उचलली आहेत. डेंगळे पूल (Dengle Bridge) परिसरातून बस चोरीला गेल्याची गंभीर घटना आणि रस्त्यावरील वाढते अपघात पाहता, कर्मचाऱ्यांसाठी नवीन मार्गदर्शक तत्त्वे लागू करण्यात आली आहेत. यापुढे कर्तव्यात कसूर करणाऱ्या किंवा नियमांचे उल्लंघन करणाऱ्या कर्मचाऱ्यांविरुद्ध केवळ विभागीय चौकशीच नाही, तर थेट पोलीस कारवाई करण्याचा इशाराही देण्यात आला आहे.

बसची सुरक्षा आणि पार्किंगबाबत नवे निर्बंध

नव्याने जाहीर करण्यात आलेल्या नियमांनुसार, चालकाने बस उभी करताना किंवा विश्रांतीसाठी जाताना इंजिन सुरू ठेवण्यास पूर्णपणे बंदी घालण्यात आली आहे. बस थांबवल्यानंतर इंजिन बंद करून तिची चावी स्वतःच्या ताब्यात ठेवणे आता प्रत्येक चालकासाठी बंधनकारक असेल. तसेच, बस केवळ अधिकृत आणि सुरक्षित वाहनतळावरच पार्क करावी लागणार असून, पार्किंगनंतर बसचे सर्व दरवाजे सुरक्षितपणे बंद आहेत याची खात्री चालक आणि वाहक या दोघांनाही करावी लागेल.

डेंगळे पुलावर बसमध्ये चावी सोडून निष्काळजीपणा दाखवणाऱ्या चालकावर प्रशासनाने निलंबनाची (Suspension) कारवाई केली आहे. संबंधित खाजगी ठेकेदाराला या चालकाची सेवा कायमची खंडित करण्याचे आदेश देण्यात आले आहेत. दरम्यान, बस पळवून नेणाऱ्या अज्ञात व्यक्तीचा शोध पोलीस घेत असून, अशा घटना पुन्हा घडू नयेत यासाठी हा ‘चावीचा नियम’ अत्यंत कळीचा ठरणार आहे.

कर्मचाऱ्यांची वर्तणूक आणि ठेकेदारांना अल्टिमेटम

प्रशासनाने कर्मचाऱ्यांच्या व्यसनाधीनतेबाबतही अत्यंत कठोर भूमिका घेतली आहे. ड्युटीवर असताना जर कोणी मद्यपान किंवा अमली पदार्थांचे सेवन केलेले आढळले, तर त्याची नोकरी त्वरित संपुष्टात आणली जाईल. यासोबतच शहरात बस चालवताना वेगमर्यादेचे उल्लंघन केल्यास संबंधित चालकाकडून मोठा दंड वसूल केला जाणार आहे. प्रवाशांच्या जिवाशी खेळणाऱ्या कोणत्याही प्रकारच्या बेशिस्त वर्तणुकीला आता प्रशासनाकडून अभय मिळणार नाही.

पीएमपी ताफ्यातील खासगी बस ठेकेदारांना या सर्व नियमांची अंमलबजावणी करण्यासाठी ७ दिवसांची मुदत (Ultimatum) देण्यात आली आहे. या सात दिवसांच्या कालावधीनंतर, सर्व नियमांचे पालन होत असल्याचा अधिकृत अहवाल ठेकेदारांना प्रशासनाकडे सादर करावा लागेल. प्रवाशांची सुरक्षा हेच आमचे मुख्य उद्दिष्ट असून, सुरक्षेच्या मानकांमध्ये कोणतीही तडजोड केली जाणार नाही, असे पीएमपी व्यवस्थापनाने स्पष्ट केले आहे.

News Title: PMPML Pune Bus Driver New Safety Rules