Rahul Gandhi | ‘पंतप्रधानांना आणि मला पत्नी नाही…’ महिला आरक्षणावर हे काय बोलून गेले राहुल गांधी?

Rahul Gandhi | लोकसभेत महिला आरक्षण सुधारणा विधेयकावरील चर्चेदरम्यान सत्ताधारी आणि विरोधकांमध्ये जोरदार शाब्दिक युद्ध पाहायला मिळाले. विशेषतः विरोधी पक्षनेते राहुल गांधी (Rahul Gandhi) यांनी आपल्या भाषणात मिश्किल टिप्पणी करत सभागृहातील वातावरण हलके करण्याचा प्रयत्न केला, मात्र त्यानंतर लगेचच विधेयकातील तांत्रिक त्रुटींवरून केंद्र सरकारवर बोचरी टीकाही केली. या चर्चेत महिलांचे महत्त्व, कौटुंबिक संस्कार आणि राजकीय आरक्षणातील जातनिहाय वाटा हे मुद्दे केंद्रस्थानी राहिले.

मिश्किल टिप्पणी आणि प्रियांका गांधींचे कौतुक

विधेयकावर बोलताना राहुल गांधी यांनी महिलांच्या प्रभावाचा उल्लेख केला आणि हसत हसत पंतप्रधान नरेंद्र मोदी (Narendra Modi) यांच्या वैयक्तिक आयुष्यावर टिप्पणी केली. “मलाही पत्नी नाही आणि पंतप्रधानांनाही नाही,” असे विधान त्यांनी करताच सभागृहात एकच हस्यकल्लोळ उडाला. तत्पूर्वी, अध्यक्ष ओम बिरला (Om Birla) यांनी राहुल यांच्या हाताला झालेल्या दुखापतीबद्दल विचारपूस केली, ज्यावर त्यांनी खेळादरम्यान दुखापत झाल्याचे स्पष्ट केले.

राहुल गांधींनी आपली बहीण प्रियांका गांधी (Priyanka Gandhi) हिच्या संसदेतील प्रभावी भाषणाचे जाहीर कौतुक केले. प्रियांकाने अवघ्या पाच मिनिटांत जे साध्य केले, ते आपल्याला २० वर्षांत जमले नाही, असे म्हणत त्यांनी दाद दिली. त्यांच्या या कौतुकामुळे गृहमंत्री अमित शाह (Amit Shah) यांच्यासह अनेक खासदारांच्या चेहऱ्यावर स्मितहास्य उमटले. आपल्या आजी इंदिरा गांधी (Indira Gandhi) यांच्याकडून मिळालेल्या सत्याच्या आणि निर्भीडपणाच्या शिकवणीचा उल्लेख करत त्यांनी राजकीय जीवनातील संघर्षावर भाष्य केले.

विधेयकावरून सरकारवर गंभीर आरोप

भाषणाच्या उत्तरार्धात राहुल गांधी यांनी आक्रमक पवित्रा घेत हे विधेयक म्हणजे महिला सक्षमीकरण नसून ‘निवडणूक नकाशा’ बदलण्याचा कट असल्याचा आरोप केला. हे विधेयक अनुसूचित जाती (SC), अनुसूचित जमाती (ST) आणि विशेषतः इतर मागासवर्गीय (OBC) समुदायांच्या हक्कांवर गदा आणणारे असल्याचे त्यांनी म्हटले. ओबीसी महिलांसाठी स्वतंत्र आरक्षणाची तरतूद नसल्यामुळे हे विधेयक अपूर्ण असल्याची टीका त्यांनी केली.

राहुल यांच्या मते, २०२३ मध्ये मंजूर झालेले मूळ विधेयक हे महिलांसाठी योग्य होते, मात्र सध्याच्या विधेयकाचा वापर केवळ राजकीय फायद्यासाठी केला जात आहे. सरकार जनतेचे लक्ष मूळ समस्यांवरून विचलित करण्यासाठी आरक्षणाच्या नावाखाली नवीन डावपेच आखत असल्याचा दावा त्यांनी केला. “अंधाऱ्या बाजूचा सामना करण्याऐवजी सरकार पळ काढत आहे,” अशा शब्दांत त्यांनी सत्ताधारी पक्षावर टीकास्त्र सोडले आणि हे विधेयक ओबीसी विरोधी असल्याचे सांगत विरोधकांनी कडाडून विरोध दर्शवला.

News Title: Rahul Gandhi Statement on Women Reservation Bill 2026