HSC Result 2026 | १२ वीच्या निकालात मोठा घोळ! बोर्डाने घेतला ‘हा’ तातडीचा निर्णय
HSC Result 2026 | राज्यातील बारावी परीक्षेत यश मिळवलेल्या लाखो विद्यार्थ्यांसाठी महत्त्वाची माहिती समोर आली आहे. यंदाच्या निकालातील काही छापील गुणपत्रिका आणि प्रमाणपत्रांवर विद्यार्थ्यांचे छायाचित्र मुद्रित न झाल्याचे आढळून आले आहे. या त्रुटीची गंभीर दखल घेत महाराष्ट्र राज्य माध्यमिक व उच्च माध्यमिक शिक्षण मंडळाने संबंधित शाळा आणि कनिष्ठ महाविद्यालयांना तातडीच्या सूचना दिल्या आहेत.
फेब्रुवारी-मार्च 2026 मध्ये झालेल्या बारावी परीक्षेसाठी एकूण 14 लाख 33 हजार 058 विद्यार्थी बसले होते. त्यापैकी 12 लाख 86 हजार 843 विद्यार्थ्यांनी यश संपादन केले आहे. मात्र निकालानंतर काही विद्यार्थ्यांच्या गुणपत्रिका आणि प्रमाणपत्रांवर छायाचित्रे छापली गेली नसल्याचे निदर्शनास आले. ही बाब मुंबई विभागीय मंडळाने (Mumbai Divisional Board) राज्य मंडळाच्या निदर्शनास आणून दिली.
या पार्श्वभूमीवर शाळा आणि कनिष्ठ महाविद्यालयांना संबंधित विद्यार्थ्यांचे स्पष्ट छायाचित्र पुन्हा सादर करण्याचे निर्देश देण्यात आले आहेत. छायाचित्र जेपीजी (JPG) स्वरूपात पाठवणे आवश्यक असून प्रत्येक फोटो फाइलला विद्यार्थ्याचा सीट नंबर नाव म्हणून देणे बंधनकारक करण्यात आले आहे. तसेच फोटो फाइलचा आकार 50 केबीपेक्षा कमी ठेवण्याच्या सूचना मंडळाने दिल्या आहेत. या माध्यमातून छपाईतील त्रुटी दूर करण्याचे काम वेगाने सुरू करण्यात आले आहे.
HSC Result 2026 | गुणपत्रिका आणि प्रमाणपत्र एकत्र छापल्याने अडचण :
यंदाच्या बारावी परीक्षेसाठी महाराष्ट्र राज्य माध्यमिक व उच्च माध्यमिक शिक्षण मंडळाने (Maharashtra State Board of Secondary and Higher Secondary Education) महत्त्वाचा बदल केला होता. प्रथमच गुणपत्रिका आणि प्रमाणपत्र एकाच दस्तऐवजात देण्याची व्यवस्था लागू करण्यात आली. या नव्या स्वरूपात विद्यार्थ्यांचा फोटो आणि क्यूआर कोड (QR Code) समाविष्ट करण्यात आला होता, ज्यामुळे बनावट कागदपत्रांना आळा बसणे आणि पडताळणी प्रक्रिया सुलभ होणे अपेक्षित होते.
या बदलासाठी विद्यार्थ्यांच्या हॉलतिकिटावरील छायाचित्रांचा वापर करण्यात आला होता. मात्र अनेक विद्यार्थ्यांचे फोटो अस्पष्ट किंवा चुकीचे असल्याने शाळांना सुधारित छायाचित्रे अपलोड करण्यास सांगण्यात आले होते. निकाल जाहीर होण्यापूर्वी बोर्डाने फोटो करेक्शन पोर्टल सुरू करून मार्च-एप्रिल 2026 दरम्यान फोटो आणि नाव पुन्हा अपलोड करण्याची अंतिम संधी दिली होती. चुकीची माहिती अपलोड झाल्यास संबंधित शाळा किंवा प्राचार्य जबाबदार राहतील, अशी सूचनाही देण्यात आली होती. त्यामुळे काही ठिकाणी प्रक्रिया पूर्ण न होणे, अंतिम मुदतीबाबत संभ्रम निर्माण होणे आणि पालक-विद्यार्थ्यांना माहिती न मिळणे अशा कारणांमुळे ही समस्या उद्भवल्याचे समोर आले आहे.
जर एखाद्या विद्यार्थ्याच्या गुणपत्रिकेवर चुकीचे, अस्पष्ट किंवा अनुपस्थित छायाचित्र आढळत असेल, तर संबंधित विद्यार्थ्यांनी त्वरित आपल्या शाळेच्या मुख्याध्यापकांशी संपर्क साधावा किंवा विभागीय बोर्ड कार्यालयाकडे तक्रार नोंदवावी, असे आवाहन करण्यात आले आहे.
