CBSE Result 2026 | दहावीच्या विद्यार्थ्यांची धाकधूक वाढली! उद्या १० वीचा निकाल लागणार?

CBSE Result 2026 | सीबीएसई (Central Board of Secondary Education) 10वी परीक्षेच्या निकालाची प्रतीक्षा आता शेवटच्या टप्प्यात आली आहे. विद्यार्थ्यांमध्ये मोठी उत्सुकता निर्माण झाली असून डिजिलॉकरवरील नव्या अपडेटमुळे निकाल जाहीर होण्याची शक्यता अधिक बळकट झाली आहे. 15 ते 16 एप्रिलदरम्यान निकाल लागण्याचा अंदाज व्यक्त केला जात आहे.

सीबीएसई (Central Board of Secondary Education) कडून अधिकृत निकालाची तारीख जाहीर करण्यात आलेली नसली तरी डिजिलॉकर (DigiLocker) प्लॅटफॉर्मवर “Class 10th Result – Coming Soon” असा संदेश दिसू लागल्याने निकालाची घोषणा जवळ आल्याचे संकेत मिळाले आहेत. त्यामुळे विद्यार्थी आणि पालकांमध्ये उत्सुकतेसोबतच थोडी चिंता देखील वाढली आहे. विविध माध्यमांच्या माहितीनुसार, 15 किंवा 16 एप्रिल रोजी निकाल जाहीर होण्याची शक्यता वर्तवली जात आहे.

निकाल जाहीर झाल्यानंतर विद्यार्थ्यांना तो पाहण्यासाठी results.cbse.nic.in या अधिकृत संकेतस्थळावर जाऊन आपला रोल नंबर टाकावा लागेल. तसेच डिजिलॉकर (DigiLocker) अॅप किंवा वेबसाइटच्या माध्यमातून देखील गुणपत्रिका डाउनलोड करता येणार आहे. या सुविधेमुळे विद्यार्थ्यांना निकाल सहज आणि जलद पद्धतीने मिळणार आहे.

CBSE Result 2026 | परीक्षा वेळापत्रक व नवा बदल :

यंदा सीबीएसई (Central Board of Secondary Education) 10वी आणि 12वीच्या परीक्षा 17 फेब्रुवारी ते 10 मार्च या कालावधीत पार पडल्या. या परीक्षांमध्ये भारतासह 26 देशांतील सुमारे 25 लाखांहून अधिक विद्यार्थ्यांनी सहभाग घेतला होता. 31 हजारांपेक्षा जास्त शाळांमधील विद्यार्थी या परीक्षेला बसले होते, तर 8,074 हून अधिक केंद्रांवर परीक्षा आयोजित करण्यात आल्या होत्या.

दरम्यान, यावर्षी बोर्डाने मोठा निर्णय घेत 10वीची परीक्षा दोन सत्रांमध्ये घेण्याचा बदल केला आहे. पहिल्या सत्राचा निकाल एप्रिलमध्ये जाहीर करण्याचा प्रयत्न असून, त्यानंतर 15 मे ते 1 जून 2026 दरम्यान दुसरी परीक्षा होणार आहे. या दुसऱ्या संधीमुळे विद्यार्थ्यांना आपले गुण सुधारण्याची संधी मिळणार आहे. त्यामुळे निकाल लवकर जाहीर करण्यावर बोर्डाचा विशेष भर आहे.