Mumbai-Nashik Highway Accident | मुंबई-नाशिक महामार्गावर भीषण अपघात! कारचा अक्षरशः चक्काचूर, एकाने गमावला जीव

Mumbai-Nashik Highway Accident | ठाणे (Thane) जिल्ह्यातील मुंबई-नाशिक महामार्गावर पहाटे घडलेल्या भीषण अपघाताने परिसर हादरला आहे. एका वेगवान कारने ट्रेलरला जोरदार धडक दिल्याने चालकाचा जागीच मृत्यू झाला, तर इतर प्रवासी गंभीर जखमी झाले. या घटनेमुळे रस्ते सुरक्षेचा प्रश्न पुन्हा ऐरणीवर आला आहे.

मंगळवारी पहाटे सुमारे 3:55 वाजण्याच्या सुमारास कळवा परिसरातील खारेगाव टोलनाक्याजवळ ही दुर्घटना घडली. वेगात असलेली कार अचानक चालकाच्या ताब्यातून सुटली आणि पुढे उभ्या असलेला ट्रेलर ट्रकवर जाऊन आदळला. या धडकेत 26 वर्षीय चालक दीपक पाटेकर (Deepak Patekar) याचा घटनास्थळीच मृत्यू झाला. अपघाताचा जोर इतका होता की कारचा समोरील भाग पूर्णपणे चिरडला गेला होता. (mumbai nashik highway crash)

या अपघातानंतर परिसरात गोंधळ उडाला होता. कारमध्ये अडकलेल्या जखमींना बाहेर काढण्यासाठी बचाव पथकाला मोठे प्रयत्न करावे लागले. घटनास्थळी उपस्थित असलेल्या नागरिकांनीही मदतकार्यामध्ये सहभाग घेतला. अपघाताची तीव्रता पाहता काही काळ परिस्थिती नियंत्रणाबाहेर गेल्यासारखी झाली होती.

Mumbai-Nashik Highway Accident | जखमींवर उपचार, तपास सुरू :

या दुर्घटनेत चार जण जखमी झाले असून त्यापैकी दोघांची प्रकृती गंभीर असल्याचे समोर आले आहे. जखमींना तातडीने जवळच्या खासगी रुग्णालयात दाखल करण्यात आले असून त्यांच्यावर उपचार सुरू आहेत. एका जखमीला दुसऱ्या रुग्णालयात हलवण्यात आले आहे, तर एका महिलेला किरकोळ दुखापत झाली आहे.

प्राथमिक माहितीनुसार, अपघातग्रस्त सर्वजण वागळे एस्टेट (Wagle Estate) येथील आयटी पार्कमध्ये काम आटोपून डोंबिवली (Dombivli)कडे परतत होते. रात्री उशिरा प्रवास करत असताना वेग, थकवा किंवा वाहनावरील नियंत्रण सुटल्यामुळे हा अपघात घडल्याचा अंदाज व्यक्त केला जात आहे. घटनेची माहिती मिळताच पोलिस, अग्निशमन दल आणि आपत्ती व्यवस्थापन पथक घटनास्थळी दाखल झाले व मदतकार्य हाती घेतले. अपघातामुळे काही काळ वाहतूक विस्कळीत झाली होती, मात्र नंतर ती सुरळीत करण्यात आली.

या प्रकरणी पोलिसांनी गुन्हा दाखल करून तपास सुरू केला असून सीसीटीव्ही फुटेज, वाहनांची स्थिती आणि साक्षीदारांच्या जबाबांच्या आधारे अपघाताचे नेमके कारण शोधले जात आहे. या घटनेमुळे पुन्हा एकदा वाहन चालवताना वेग मर्यादा आणि सतर्कतेचे महत्त्व अधोरेखित झाले आहे.