डॉ. दिनेश वाघाडेंची आयएमए अमरावती अध्यक्षपदी निवड:सिताराम बाबा कॉलनीवासियांनी केला सत्कार
डॉ. दिनेश वाघाडे यांची नुकतीच इंडियन मेडिकल असोसिएशन (IMA) च्या अमरावती शाखेच्या अध्यक्षपदी निवड झाली आहे. या निवडीबद्दल सिताराम बाबा कॉलनीतील रहिवाशांनी त्यांच्या घरी जाऊन त्यांचा सत्कार केला. या सत्कार समारंभात आंतरराष्ट्रीय योग प्रशिक्षक डॉ. राजू डांगे, इच्छापूर्ती गणेश मंदिर व्यवस्थापन समितीचे अध्यक्ष प्रभाकर तीनखेडे, माजी अध्यक्ष अरुणभाऊ ठाकरे, प्रा. मिलिंद चुटके आणि कोषाध्यक्ष प्रदीप सागळे उपस्थित होते. त्यांनी संयुक्तपणे डॉ. वाघाडे यांना शाल, पुष्पगुच्छ आणि पुस्तिका देऊन सन्मानित केले. डॉ. दिनेश वाघाडे यांनी यापूर्वी आयएमएमध्ये उपाध्यक्ष, सचिव आणि कार्यकारिणी सदस्य म्हणून काम केले आहे. ते सायंटिफिक उपसमितीचे अध्यक्ष तसेच सीडब्ल्यूसी सदस्य आणि महाराष्ट्र राज्य क्रीडा समितीचे अध्यक्ष अशा विविध जबाबदाऱ्याही त्यांनी यशस्वीपणे पार पाडल्या आहेत. वैद्यकीय व्यवसायाव्यतिरिक्त, डॉ. वाघाडे अनेक सामाजिक संस्थांचे पदाधिकारी आहेत आणि फिजिशियन असोसिएशनचे सचिवही राहिले आहेत. सिताराम बाबा कॉलनी येथील इच्छापूर्ती गणेश मंदिराच्या वर्धापन दिनानिमित्त ते अनेकदा मोफत आरोग्य शिबिरे आयोजित करतात आणि कॉलनीतील रहिवाशांना तातडीच्या वेळी प्राधान्याने वैद्यकीय सेवा देतात. ते हायटेक मल्टी स्पेशालिटी हॉस्पिटलचे संचालक म्हणूनही परिचित आहेत. यावेळी डॉ. वाघाडे यांच्या पत्नी मेघा दिनेश वाघाडे आणि त्यांच्या मातोश्री उपस्थित होत्या.
वार्ताहार/प्रतिनिधी
