छत्रपती संभाजीनगर शहरातील चिकलठाणा परिसरातील हिनानगर भागात आज एका मंडप डेकोरेशनच्या गोडाऊनला भीषण आग लागल्याची घटना घडली. या आगीने अवघ्या काही वेळातच रौद्ररूप धारण केल्याने परिसरात मोठी खळबळ उडाली असून, आकाशात धुराचे काळे लोट लांबवर दिसत आहेत. सुदैवाने, या घटनेत आतापर्यंत कोणतीही जीवितहानी झाल्याचे वृत्त नाही. हिनानगर परिसरात मंडप डेकोरेशनचे साहित्य ठेवण्यासाठी एक मोठे गोडाऊन आहे. सकाळी शहरात सर्वत्र धुलिवंदनचा उत्साह शिगेला पोहोचलेला असतानाच अचानक या गोडाऊनला आग लागली. गोडाऊनमध्ये कापड, बांबू, लाकूड आणि प्लास्टिकचे मोठ्या प्रमाणावर साहित्य असल्याने आगीने क्षणार्धात पेट घेतला. आगीची तीव्रता इतकी भीषण होती की, काही मिनिटांतच संपूर्ण गोडाऊन आगीच्या विळख्यात सापडले. आकाशात रंगांच्या गुलालऐवजी आगीच्या ज्वाळा आणि धुराचे लोट दिसू लागल्याने परिसरातील नागरिकांनी हातातले रंग सोडून घटनास्थळाकडे धाव घेतली. अग्निशामक दलाचे शर्थीचे प्रयत्न आगीची माहिती मिळताच अग्निशमन दलाचे जवान बंबांसह तातडीने घटनास्थळी दाखल झाले. गोडाऊनच्या आजूबाजूला दाट वस्ती असल्याने आग पसरू नये, यासाठी जवानांकडून शर्थीचे प्रयत्न सुरू आहेत. पाण्याचा मारा करून आगीवर नियंत्रण मिळवण्याचे काम युद्धपातळीवर सुरू असून, धुरामुळे बचाव कार्यात काही प्रमाणात अडथळे येत आहेत. लाखोंचे साहित्य खाक झाल्याचा अंदाज या आगीत गोडाऊनमधील मंडप डेकोरेशनचे लाखो रुपयांचे साहित्य जळून खाक झाल्याची शक्यता वर्तवण्यात येत आहे. आगीचे नेमके कारण अद्याप स्पष्ट झालेले नाही. शॉर्ट सर्किटमुळे ही आग लागली असावी, असा प्राथमिक अंदाज व्यक्त केला जात आहे. मात्र, आगीवर पूर्णपणे नियंत्रण मिळवल्यानंतर आणि पंचनामा केल्यानंतरच नुकसानाचा नेमका आकडा आणि आगीचे कारण स्पष्ट होईल.
संभाजीनगरमध्ये धुलिवंदनच्या रंगात आगीचे विरजण!:चिकलठाण्यात मंडप डेकोरेशनचे गोडाऊन भस्मसात; आकाशात धुराचे लोट, परिसरात खबराट
