ओझरमध्ये विधी सेवा महाशिबिर उत्साहात:न्यायमूर्ती आरिफ डॉक्टर म्हणाले- वकील व्यवसाय समाजकार्याचे साधन

मुंबई उच्च न्यायालयाचे न्यायमूर्ती तथा पुणे जिल्ह्याचे पालक न्यायमूर्ती आरिफ सा. डॉक्टर यांनी वकिली व्यवसाय हे केवळ एक व्यवसाय नसून समाजकार्याचे साधन असल्याचे प्रतिपादन केले. समाजातील प्रत्येक घटकाला न्याय मिळवून देणे ही आपली सामाजिक जबाबदारी आहे, असेही ते म्हणाले. ओझर (ता. जुन्नर) येथे आयोजित विधी सेवा महाशिबिर व शासकीय योजनांच्या महामेळाव्याच्या उद्घाटनप्रसंगी ते बोलत होते. राष्ट्रीय विधी सेवा प्राधिकरण, सर्वोच्च न्यायालय, नवी दिल्ली आणि महाराष्ट्र राज्य विधी सेवा प्राधिकरण, उच्च न्यायालय, मुंबई यांच्या मार्गदर्शनाखाली हा भव्य मेळावा आयोजित करण्यात आला होता. जिल्हा विधी सेवा प्राधिकरण, तालुका विधी सेवा समिती, जुन्नर आणि तालुका बार असोसिएशनमार्फत श्री विघ्नहर सांस्कृतिक भवन, ओझर येथे याचे आयोजन करण्यात आले होते. यावेळी प्रमुख जिल्हा व सत्र न्यायाधीश तथा जिल्हा विधी सेवा प्राधिकरणाचे अध्यक्ष महेंद्र के. महाजन, जिल्हा परिषदेचे मुख्य कार्यकारी अधिकारी चंद्रकांत वाघमारे, जिल्हा ग्रामीण पोलीस अधीक्षक संदीपसिंह गिल्ल, जिल्हा विधी सेवा प्राधिकरण, तालुका विधी सेवा समितीचे अध्यक्ष ॲड. सुजीत शेलार आणि तालुका वकील संघाचे अध्यक्ष ॲड. हेमंत हडावळे यांच्यासह वकील संघाचे पदाधिकारी व पक्षकार उपस्थित होते. न्यायमूर्ती आरिफ सा. डॉक्टर यांनी पुणे जिल्ह्याने शासकीय योजनांचा नागरिकांना लाभ मिळवून देण्यात नेहमीच पुढाकार घेतल्याबद्दल अभिनंदन केले. शासनामार्फत राबविण्यात येणाऱ्या विविध लोककल्याणकारी योजनांमुळे लोकांच्या जीवनात सकारात्मक बदल घडतात. त्यामुळे नागरिकांना या योजनांची माहिती व लाभ देण्यासाठी आयोजित हा मेळावा अत्यंत महत्त्वाचा ठरेल, असा विश्वास त्यांनी व्यक्त केला. जास्तीत जास्त नागरिकांनी या मेळाव्याचा लाभ घ्यावा, असे आवाहनही न्यायमूर्ती डॉक्टर यांनी केले. यावेळी बोलताना प्रमुख जिल्हा व सत्र न्यायाधीश महेंद्र के. महाजन म्हणाले की, खेड-राजगुरूनगर, घोडेगाव, जुन्नर आणि शिरूर तालुक्यातील सामाजिक व आर्थिकदृष्ट्या दुर्बल घटकातील नागरिकांना त्यांच्यासाठी असलेल्या विविध शासकीय योजनांचा प्रत्यक्ष लाभ मिळावा, तसेच कायदेविषयक हक्कांविषयी जागरूकता निर्माण व्हावी, या उद्देशाने या महामेळाव्याचे आयोजन करण्यात आले आहे. समाजाच्या उन्नतीसाठी असे मेळावे महत्त्वपूर्ण ठरतात, असेही त्यांनी नमूद केले.