पूना, इंदिरा कॉलेजने पटकावला ३९ वा फार्मसी क्रिकेट करंडक:भारती विद्यापीठात सात दिवसीय स्पर्धेचे यशस्वी आयोजन

भारती विद्यापीठ अभिमत विश्वविद्यालयाच्या पूना कॉलेज ऑफ फार्मसीने आयोजित केलेल्या ३९ व्या राज्यस्तरीय फार्मसी क्रिकेट करंडक स्पर्धेत पूना कॉलेज ऑफ फार्मसी (पुरुष गट) आणि इंदिरा कॉलेज ऑफ फार्मसी (महिला गट) यांनी विजेतेपद पटकावले. ही सात दिवसीय स्पर्धा भारती विद्यापीठाच्या एरंडवणे संकुलात आयोजित करण्यात आली होती. फार्मसी विद्यार्थ्यांमध्ये संवाद आणि क्रीडासौहार्द वाढवणे हा या स्पर्धेचा मुख्य उद्देश होता. या स्पर्धेत विविध महाविद्यालये आणि औषधनिर्माणशास्त्र कंपन्यांचे एकूण ११ पुरुष संघ आणि ७ महिला संघ सहभागी झाले होते. महिला गटातील अंतिम सामना शिवनगर विद्या प्रसारक मंडळ (एस.व्ही.पी.एम.) कॉलेज ऑफ फार्मसी, बारामती आणि इंदिरा कॉलेज ऑफ फार्मसी यांच्यात खेळला गेला. इंदिरा कॉलेजने सलग पाचव्यांदा हा फार्मसी कप जिंकण्याचा मान मिळवला, तर आयोजक पूना कॉलेजने १५ वर्षांनंतर विजेतेपद पटकावले. बक्षीस वितरण समारंभात सिंहगड कॉलेज ऑफ फार्मसी, पुणे येथील प्राचार्य डॉ. राजेश पाटील यांच्या हस्ते मानाचा फार्मसी करंडक व मानपत्र प्रदान करण्यात आले. यावेळी पूना कॉलेज ऑफ फार्मसीचे प्राचार्य डॉ. आत्माराम पवार, उपप्राचार्य डॉ. वर्षा पोखरकर आणि उपप्राचार्य डॉ. एल. सथियनारायणन उपस्थित होते. स्पर्धेचे उद्घाटन ब्राऊनडोव्ह हेल्थकेअर प्रायव्हेट लिमिटेड, मुंबईचे उपाध्यक्ष चंदन राजमाने यांच्या उपस्थितीत झाले. इंदिरा कॉलेज ऑफ फार्मसीने प्रथम फलंदाजी करताना ८ ओव्हर मध्ये १०३ धावा केल्या. त्याला उत्तर देताना एस. वी.पी.एम कॉलेजने ४८ धावा केल्या. इंदिरा कॉलेज ऑफ फार्मसी ने विजेतेपदाला गवसणी घातली.पुरुष गटात अंतिम सामना जीवनधारा फार्मा कंपनी आणि पूना कॉलेज ऑफ फार्मसी यांच्यात खेळला गेला. प्रथम फलंदाजी करताना पूना कॉलेज ऑफ फार्मसीने २० ओव्हर मध्ये १५२ धावा केल्या.त्याला प्रतिउत्तर देताना जीवनधारा फार्मा कंपनी ने १४२ धावा केल्या. या स्पर्धेचे संयोजन अक्षय खांडके, डॉ. सतीश मंडलिक, फार्मसी करंडक संयोजन प्रमुख प्रियांका कंधारे, डॉ. ज्ञानदेवी मथुरे आणि क्रीडा प्रमुख डॉ. नीलेश देशमुख यांनी केले.