रंगकर्मी अनंत नांदूरकर यांना 'शब्दयात्री' पुरस्कार:अखिल भारतीय एल्गार मराठी गझल संमेलनात सन्मानित केले जाणार

गेल्या ३० वर्षांहून अधिक काळ महाराष्ट्राला सुपरिचित असलेले रंगकर्मी, कवी आणि गझलकार अनंत नांदूरकर ‘खलिश’ यांना ‘शब्दयात्री काव्य पुरस्कार’ने सन्मानित केले जाणार आहे. अखिल भारतीय एल्गार मराठी गझल संमेलनात त्यांना हा पुरस्कार प्रदान करण्यात येईल. हा पुरस्कार साहित्यरसिक नाना लोडम यांनी पुरस्कृत केला आहे आणि तो साहित्याच्या पद्यशाखेला समर्पित आहे. पुरस्काराचे हे पहिलेच वर्ष असून, गीत, गझल, कविता, अभंग, ओवी, हायकू, मुक्तछंद आणि इतर पद्य साहित्याचा विचार यासाठी केला जातो. शाल, श्रीफळ, स्मृतिचिन्ह तसेच रोख रक्कम असे या पुरस्काराचे स्वरूप आहे. नांदूरकर हे नाट्यदिग्दर्शक, लेखक, संगीत संयोजक आणि प्रकाश योजनाकार म्हणून नाट्यक्षेत्रात प्रसिद्ध आहेत. त्यांच्या अनेक एकांकिका आणि दोन अंकी नाटकांच्या संहिता विविध नाट्यस्पर्धेत सादर झाल्या आहेत. त्यांच्या ‘अघटित’ या दोन अंकी नाट्यकृतीला कामगार नाट्य स्पर्धेत उत्कृष्ट लेखनाचा पुरस्कार मिळाला आहे. याशिवाय, जुहू, मुंबई येथे झालेल्या जागतिक मूकबधिर नाट्यस्पर्धेत अभिनेते नाना पाटेकर यांच्या हस्ते त्यांच्या बालमजुरीवर आधारित एकांकिकेस लेखन आणि निर्मितीचे पुरस्कार प्राप्त झाले आहेत. गझलकार आणि निवेदक म्हणून त्यांना शब्द साहित्य संमेलन (बँकॉक) येथेही आमंत्रित करण्यात आले होते. त्यांच्या एकंदर शब्दप्रवासातील योगदानाची दखल घेऊन त्यांना हा पुरस्कार प्रदान करण्यात येत असल्याचे आयोजक नाना लोडम यांनी सांगितले.