छत्रपती शिवाजी महाराज यांची जयंती:हिंगोलीत भरगच्च कार्यक्रमांचे आयोजन, सार्वजनिक शिवजयंती महोत्सव समितीचा पुढाकार

सार्वजनिक शिवजयंती महोत्सव समितीच्या वतीने छत्रपती शिवाजी महाराज जयंती निमित्त हिंगोलीत ता. ११ फेब्रुवारी पासून विविध कार्यक्रमांचे आयोजन करण्यात आले आहे. यावेळी सांस्कृतीक कार्यक्रम तसेच विविध स्पर्धा घेतल्या जाणार आहेत. येथील रामलिला मैदानावर ता. ११ फेब्रुवारी रोजी सकाळी ८ वाजता क्रिकेट स्पर्धा होईल. सकाळी १० वाजता जिल्हा मध्यवर्ती बँकेच्या परिसरात शिवचरित्रावर आधारीत ऑनलाईन परीक्षा होईल. ता. १२ फेब्रुवारी रोजी सकाळी ११ वाजता छत्रपती शिवाजी महाराज पुर्णाकृती पुतळा परिसरात व्हॉलीबॉल स्पर्धा, तसेच ११.३० वाजता शिवचरित्रावर, ऐतिहासीक छायाचित्रावर विद्यार्थ्यांना माहिती दिली जाईल. त्यानंतर ता. १३ फेब्रुवारी रोजी सायंकाळी साडेसहा वाजता अ‍ॅड. पंडितराव देशमुख, क्रीडा संकुल अकोला रोड येथे लॉन टेनिस स्पर्धा , १४ फेब्रुवारी शनिवार रोजी सकाळी ५.३० ते ७ छत्रपती शिवाजी महाराज पुर्णाकृती पुतळा परिसरात थॉयरॉईड, मधुमेहावर मार्गदर्शन होईल. ता. १५ फेब्रुवारी रोजी सकाळी ७ वाजता छत्रपती शिवाजी महाराज पुर्णाकृती पुतळा परिसरात महिला व मुलांसाठी मॅरेथॉन स्पर्धा तर रात्री ७ वाजता छत्रपती शिवाजी महाराज पुर्णाकृती परिसरात कवि संमेलन होईल. १६ फेब्रुवारी सोमवार रोजी सकाळी ८.३० वाजता स्टडी सर्कल पॉईट गुरुकुल येथे शिवचरित्रावर सामान्य ज्ञान स्पर्धा घेतली जाणार आहे. दुपारी १२ वाजता आनंदनगरी, दुपारी चार वाजता होम मिनीस्टर स्पर्धा होईल. ता. १७ फेब्रुवारी रोजी सकाळी साडेनऊ वाजता बालगट व खुल्या गटात वेशभुषा, अभिनय, नृत्य स्पर्धा घेतली जाणार आहे ता. १८ फेब्रुवारी बुधवारी सकाळी १० वाजता वक्तृत्व स्पर्धा, दुपारी चार वाजता महिलांसाठी रांगोळी स्पर्धा होईल. सायंकाळी ६ वाजता दिपोत्सवाचा कार्यक्रम होणार आहे. रात्री ७ वाजता सांस्कृतीक कार्यक्रम व तीन दिवशीय स्पर्धांचा समारोप होईल. सदर सर्व कार्यक्रम छत्रपती शिवाजी महाराज पुतळा परिसरात होणार आहेत. ता. १९ फेब्रुवारी रोजी सकाळी ६ वाजता छत्रपती शिवाजी महाराज पुर्णाकृती पुतळा परिसरात शिव अभिषेक होणार आहे. सकाळी ७ वाजता ध्वजारोहण, ८ वाजता शिव पाळणा, शिवपुजन व शिव गजर होणार आहे. १० वाजता रक्तदान शिबीर घेतले जाईल. त्यानंतर शहरातून भव्य मिरवणुक काढली जाणार आहे.