मलकापूर हादरले!:दाम्पत्याला चाकू-विळ्याचा धाक दाखवून लुटले; विवाहितेवर शेतात सामूहिक बलात्कार

मलकापूर तालुक्यातील दुधलगाव परिसरात एक अत्यंत संतापजनक घटना उघडकीस आली आहे. दोन अज्ञात नराधमांनी शेतातील घरात घुसून एका दाम्पत्याला चाकू आणि विळ्याचा धाक दाखवून लुटले. त्यानंतर पतीला जीवे मारण्याची धमकी देत विवाहितेला बळजबरीने जवळच असलेल्या शेतात नेऊन दोघांनी आळीपाळीने सामूहिक बलात्कार केला. ही धक्कादायक घटना 17 जुलै रोजी रात्री 11 वाजेच्या सुमारास घडली असून, या प्रकरणी मलकापूर ग्रामीण पोलिस ठाण्यात गंभीर कलमान्वये गुन्हा दाखल करण्यात आला आहे. मिळालेल्या माहितीनुसार, पीडित महिला आपल्या पतीसोबत दुधलगाव शिवारातील शेतामध्ये असलेल्या घरात झोपलेली होती. रात्री 11 वाजता दोन अज्ञात इसमांनी त्यांच्या घराचा दरवाजा जबरदस्तीने तोडून आत प्रवेश केला. त्यापैकी एकाच्या हातात चाकू तर दुसऱ्याच्या हातात विळा होता. घरात घुसताच दोन्ही आरोपींनी दाम्पत्याला शस्त्रांचा धाक दाखवून धमकावण्यास सुरुवात केली. त्यांनी पतीजवळील मोबाईल आणि नगदी 600 रुपये जबरदस्तीने हिसकावून घेतले. दागिने न मिळाल्याने विवाहितेवर अत्याचार पैसे आणि मोबाईल लुटल्यानंतर आरोपींनी दाम्पत्याकडे सोन्या-चांदीच्या दागिन्यांची मागणी केली. मात्र, घरात दागिने उपलब्ध नसल्याचे दाम्पत्याने सांगितले. यामुळे संतप्त झालेल्या नराधमांनी दाम्पत्याला जबरदस्तीने ओढत जवळील शेतात नेले. तेथे पतीच्या गळ्याला विळा लावून जीवे मारण्याची धमकी देण्यात आली आणि विवाहितेवर दोघांनी आळीपाळीने अत्याचार केला. या अमानुष कृत्यानंतर दोन्ही आरोपी मोटारसायकलवरून अंधाराचा फायदा घेत पसार झाले. अज्ञात आरोपींविरुद्ध गुन्हा दाखल या घटनेनंतर पीडित महिलेने मलकापूर ग्रामीण पोलिस ठाण्यात धाव घेऊन तक्रार नोंदवली. पीडितेच्या तक्रारीवरून पोलिसांनी अज्ञात दोन आरोपींविरुद्ध सामूहिक बलात्कार, घरफोडी, आणि जीवे मारण्याची धमकी दिल्याप्रकरणी विविध गंभीर कलमान्वये गुन्हा दाखल केला आहे. या प्रकरणाचे गांभीर्य लक्षात घेऊन पोलिसांची पथके आरोपींच्या शोधासाठी रवाना झाली असून, पुढील तपास पोलिस निरीक्षक सतीश महल्ले करत आहेत. या घटनेमुळे परिसरात तीव्र संताप आणि भीतीचे वातावरण पसरले आहे.