अंजनगाव सुर्जी नगरपरिषदेची सार्वत्रिक निवडणूक शनिवारी, २० डिसेंबर रोजी पार पडली. न्यायालयीन प्रकरणामुळे पुढे ढकलण्यात आलेली ही जिल्ह्यातील एकमेव निवडणूक होती. यामध्ये सुमारे ७० टक्के मतदानाचा अंदाज व्यक्त करण्यात येत आहे. मतदानाची वेळ सकाळी ७.३० ते स
.
अंजनगाव सुर्जीमध्ये एकूण ४६ हजार ६२० मतदार आहेत. त्यांच्या मतदानासाठी ५२ केंद्रांची व्यवस्था करण्यात आली होती. दुपारी ३.३० वाजेपर्यंतच्या पहिल्या आठ तासांत ५५.४५ टक्के मतदारांनी आपला हक्क बजावला होता. यामध्ये पुरुष मतदारांची टक्केवारी ५४.३५ तर महिला मतदारांची टक्केवारी ५६.६२ होती. हाच क्रम लक्षात घेता, मतदानाची एकूण टक्केवारी ७० पर्यंत पोहोचण्याचा यंत्रणेचा अंदाज आहे.
या निवडणुकीत नगराध्यक्षपदासाठी सात उमेदवार रिंगणात होते, तर २८ नगरसेवक पदांसाठी १७३ उमेदवारांनी आपले नशीब आजमावले. एका केंद्रावरील ईव्हीएमची बॅटरी डिस्चार्ज झाल्याने ती बदलण्याची किरकोळ घटना वगळता, दिवसभर मतदान प्रक्रिया शांततेत आणि सुरळीत पार पडली.
नगराध्यक्षपदाची लढत चौरंगी झाली. शिवसेना (उबाठा) आमदार गजानन लवटे यांचे पुत्र यश लवटे हे या निवडणुकीत नगराध्यक्षपदासाठी उभे होते. त्यांच्याशिवाय भाजप, भारतीय राष्ट्रीय काँग्रेस आणि शिवसेना (शिंदे गट) यांचे उमेदवारही तुल्यबळ मानले जात होते, ज्यामुळे नगरपालिकेवर सत्ता स्थापन करण्यासाठी तीव्र स्पर्धा निर्माण झाली होती.
काँग्रेसने मुस्लिम उमेदवार दिल्याने मुस्लिम समाजाची मते निर्णायक ठरणार का, याकडे सर्वांचे लक्ष लागले होते. तसेच, शिवसेना उमेदवाराच्या प्रचारासाठी उपमुख्यमंत्री एकनाथ शिंदे यांनी शहरात ‘रोड शो’ केल्याने ही निवडणूक शिंदे गटासाठीही अत्यंत महत्त्वाची ठरली होती. निकाल जाहीर झाल्यानंतरच भाजप पुन्हा सत्तेत येणार की अंजनगाव नगरपरिषदेत सत्तापालट होणार, हे स्पष्ट होईल.
