एकनाथ शिंदेच्या नगरसेवकाला भाजपकडून बेदम मारहाण:सत्ताधारी मित्रपक्षांतील संघर्ष मारहाणीपर्यंत; CCTV ने उघड केली राजकीय हिंसा

राज्यात आणि केंद्रात एकत्र सत्तेत असलेले भाजप आणि शिवसेना (शिंदे गट) बदलापूर शहरात मात्र एकमेकांच्या अंगावर धावून जात असल्याचं धक्कादायक चित्र समोर आलं आहे. बदलापूर पश्चिमेतील सोनिवली परिसरात माघी गणपतीच्या दर्शनावेळी शिवसेना शिंदे गटाचे स्वीकृत नगरसेवक हेमंत चतुरे यांना भाजपच्या एका पदाधिकाऱ्याने आणि त्याच्या कार्यकर्त्यांनी बेदम मारहाण केल्याची घटना घडली आहे. विशेष म्हणजे, ही संपूर्ण घटना सोसायटीतील सीसीटीव्ही कॅमेऱ्यात कैद झाली असून त्यामुळे शहरातील राजकीय वातावरण प्रचंड तापलं आहे. ही घटना सोनिवली येथील आत्मिया हाइट्स या गृहनिर्माण संकुलात घडली. माघी गणपतीच्या दर्शनासाठी हेमंत चतुरे तेथे गेले असताना भाजप पदाधिकारी तेजस मस्कर आणि त्यांच्या कार्यकर्त्यांनी त्यांना अडवले. सुरुवातीला शाब्दिक वाद झाला, मात्र काही क्षणातच हा वाद थेट हाणामारीत बदलला. उपस्थित नागरिक पाहत असतानाच चतुरे यांना लाथाबुक्क्यांनी मारहाण करण्यात आली. अचानक घडलेल्या या प्रकारामुळे सोसायटी परिसरात एकच खळबळ उडाली. या मारहाणीचा थरार सीसीटीव्ही फुटेजमध्ये स्पष्टपणे कैद झाला आहे. व्हिडीओमध्ये भाजप पदाधिकारी आणि त्यांच्या कार्यकर्त्यांकडून चतुरे यांना घेरून मारहाण होत असल्याचं दिसतं. हे फुटेज सोशल मीडियावर व्हायरल होताच बदलापूरमधील राजकीय वर्तुळात संताप व्यक्त केला जात आहे. सत्ताधारी पक्षांचे कार्यकर्ते अशा प्रकारे खुलेआम हिंसाचार करत असतील, तर सामान्य नागरिकांची सुरक्षितता काय, असा सवाल उपस्थित केला जात आहे. या घटनेमागे राजकीय जळफळाट असल्याचा गंभीर आरोप शिवसेना शिंदे गटाने केला आहे. नुकत्याच झालेल्या महापालिका निवडणुकीत हेमंत चतुरे यांचा भाजपच्या उमेदवाराकडून पराभव झाला होता. मात्र, त्यानंतर शिवसेना शिंदे गटाने त्यांना स्वीकृत नगरसेवक म्हणून सभागृहात संधी दिली. ही बाब भाजपच्या स्थानिक पदाधिकाऱ्यांना खटकली होती. याच नाराजीतून आणि जळफळाटातून हा हल्ला झाल्याचा आरोप शिवसेनेचे स्थानिक पदाधिकारी संजय जाधव यांनी केला आहे. मारहाणीत जखमी झालेले हेमंत चतुरे यांना तातडीने बदलापूरमधील एका खासगी रुग्णालयात दाखल करण्यात आले. त्यांच्या अंगावर गंभीर दुखापती झाल्या असून उपचार सुरू आहेत. घटनेची माहिती मिळताच शिवसेना शिंदे गटाचे अनेक पदाधिकारी आणि कार्यकर्ते रुग्णालयात दाखल झाले. यावेळी वातावरण तणावपूर्ण बनलं होतं. शिवसेनेच्या कार्यकर्त्यांनी आरोपींवर तात्काळ कठोर कारवाईची मागणी केली आहे. या घटनेमुळे बदलापूरमधील सत्ताधारी मित्रपक्षांमधील अंतर्गत संघर्ष पुन्हा एकदा उघड झाला आहे. राज्यात भाजप आणि शिवसेना (शिंदे गट) एकत्र सरकार चालवत असले तरी स्थानिक पातळीवर दोन्ही पक्षांमधील संघर्ष वारंवार चव्हाट्यावर येत आहे. यापूर्वीही बदलापुरात आरोप-प्रत्यारोप, आंदोलनं आणि वादाचे प्रसंग घडले आहेत. मात्र, आता थेट मारहाणीपर्यंत प्रकरण गेल्याने सत्ताधाऱ्यांची प्रतिमा मलीन होत असल्याची चर्चा सुरू आहे. दरम्यान, या प्रकरणी बदलापूर पोलिस सीसीटीव्ही फुटेजच्या आधारे तपास करत आहेत. आरोपींविरोधात गुन्हा दाखल होणार का, आणि त्यांच्यावर नेमकी काय कारवाई होते, याकडे संपूर्ण बदलापूर शहराचं लक्ष लागलं आहे. सत्ताधारी पक्षांमधील हा संघर्ष कुठे थांबणार, की आणखी उग्र रूप धारण करणार, हा प्रश्न आता नागरिक विचारू लागले आहेत.