अहिल्यानगर जिल्हा मध्यवर्ती सहकारी बँकेच्या संचालक मंडळाच्या निवडणुकीच्या पार्श्वभूमीवर जिल्ह्यातील राजकीय हालचालींना वेग आला आहे. जिल्हा बँकेची निवडणूक शक्यतो बिनविरोध व्हावी, यासाठी विविध राजकीय पक्षांतील प्रमुख नेत्यांची संगमनेर येथे काँग्रेसचे ज्येष्ठ नेते बाळासाहेब थोरात यांच्या उपस्थितीत बैठक झाली. मात्र, या बैठकीला राष्ट्रवादी काँग्रेसच्या शरद पवार गटाचे खासदार निलेश लंके यांना निमंत्रण देण्यात आले नसल्याने त्यांनी नाराजी व्यक्त केली आहे. जिल्हा बँकेच्या निवडणुकीत राजकीय पक्षांमध्ये संघर्ष होऊ नये आणि शक्य तितक्या जागांवर सहमतीने उमेदवार ठरवता यावेत, यासाठी नेत्यांकडून चर्चा सुरू आहे. त्याच पार्श्वभूमीवर संगमनेर येथे बाळासाहेब थोरात यांच्या पुढाकाराने महत्त्वाची बैठक आयोजित करण्यात आली होती. या बैठकीला जिल्ह्यातील विविध पक्षांचे वरिष्ठ नेते उपस्थित होते. थोरात आणि विखे एकाच बैठकीत या बैठकीचे आणखी एक राजकीय वैशिष्ट्य म्हणजे जिल्ह्याच्या राजकारणात अनेक वर्षांपासून एकमेकांचे प्रमुख राजकीय विरोधक मानले जाणारे बाळासाहेब थोरात आणि भाजप नेते सुजय विखे पाटील हे एकाच बैठकीत सहभागी झाले. जिल्हा बँकेची निवडणूक बिनविरोध करण्यासाठी राजकीय मतभेद बाजूला ठेवून चर्चा करण्याचा प्रयत्न या बैठकीत झाल्याचे सांगितले जात आहे. मात्र, या बैठकीसाठी खासदार निलेश लंके यांना निमंत्रण देण्यात आले नसल्याने या मुद्द्याची राजकीय चर्चा सुरू झाली आहे. लंके यांनी स्वतः याबाबत प्रतिक्रिया देत आपली नाराजी स्पष्ट केली. ‘मी जिल्ह्याचा खासदार, मला बोलवायला हवे होते’ निलेश लंके यांनी सांगितले की, जिल्हा बँकेच्या निवडणुकीसंदर्भात झालेल्या बैठकीचे आपल्याला कोणतेही निमंत्रण मिळाले नव्हते. आपण अहिल्यानगर जिल्ह्याचे खासदार असून आपल्या मतदारसंघातही आठ तालुके येतात. त्यामुळे जिल्ह्यातील एवढ्या महत्त्वाच्या सहकारी संस्थेच्या निवडणुकीबाबत चर्चा करण्यासाठी आयोजित केलेल्या बैठकीला आपल्याला बोलावणे अपेक्षित होते, असे त्यांनी म्हटले. जिल्हा बँकेची निवडणूक बिनविरोध होत असेल तर त्याचे स्वागतच आहे, असेही लंके यांनी स्पष्ट केले. मात्र, निवडणुकीच्या निमित्ताने कोणाचे वैयक्तिक मतभेद किंवा हेवेदावे पुढे आणले जात असतील, तर ते योग्य नाही, अशी भूमिका त्यांनी मांडली. ‘बाळासाहेब थोरात आमचे नेतेच’ आपल्याला बैठकीला का बोलावले नाही, याबाबत बाळासाहेब थोरात यांच्याशी चर्चा करणार का, असा प्रश्न लंके यांना विचारण्यात आला. त्यावर त्यांनी बाळासाहेब थोरात हे आपले नेतेच असल्याचे सांगितले. तसेच, या विषयावर त्यांच्याशी आपण नक्की बोलणार असल्याचेही स्पष्ट केले. त्यामुळे जिल्हा बँकेच्या निवडणुकीच्या निमित्ताने सुरू असलेल्या राजकीय चर्चेला आता निलेश लंके यांच्या नाराजीची किनार मिळाली आहे. एकीकडे बँकेची निवडणूक बिनविरोध करण्यासाठी नेत्यांमध्ये चर्चा सुरू असताना दुसरीकडे बैठकीतील निमंत्रणावरूनच राजकीय मतभेद समोर आले आहेत. निवडणुकीच्या पार्श्वभूमीवर राजकीय गणिते अहिल्यानगर जिल्हा मध्यवर्ती सहकारी बँक ही जिल्ह्यातील महत्त्वाची सहकारी संस्था मानली जाते. त्यामुळे तिच्या संचालक मंडळाच्या निवडणुकीकडे जिल्ह्यातील राजकीय नेत्यांचे लक्ष लागले आहे. राज्यात महाविकास आघाडी आणि महायुतीमध्ये राजकीय संघर्ष सुरू असला तरी सहकार क्षेत्रातील निवडणुकांमध्ये स्थानिक राजकीय समीकरणे अनेकदा वेगळी पाहायला मिळतात. याच पार्श्वभूमीवर जिल्हा बँकेची निवडणूक बिनविरोध करण्यासाठी विविध पक्षांच्या नेत्यांमध्ये चर्चा सुरू आहे. मात्र, या चर्चेत कोणकोणत्या नेत्यांना सहभागी करून घेतले जाते, यावरूनही जिल्ह्यातील राजकीय समीकरणांची चर्चा होत आहे. आता निलेश लंके आणि बाळासाहेब थोरात यांच्यात या विषयावर काय चर्चा होते, याकडे लक्ष लागले आहे. हेही वाचा… मनोज जरांगे पाटलांनी अखेर डिफेंडर कार परत केली:अंतरवालीत पोहोचताच मालकाला फोन, नेमकं काय म्हणाले? अंतरवाली सराटी येथील उपोषणानंतर प्रकृतीच्या कारणामुळे छत्रपती संभाजीनगरमधील रुग्णालयात उपचार घेत असलेले मनोज जरांगे पाटील यांना अखेर आज डिस्चार्ज देण्यात आला. रुग्णालयातून बाहेर पडल्यानंतर जरांगे पाटील थेट अंतरवाली सराटीकडे रवाना झाले. तेथे पोहोचल्यानंतर त्यांनी ग्रामस्थ आणि मराठा बांधवांशी संवाद साधला. याचदरम्यान त्यांच्या वापरातील चर्चेतील पांढऱ्या रंगाची डिफेंडर कार अखेर मालकाकडे परत करण्यात आली. सविसतर वाचा…