Perfumed zarda worth Rs 4.20 lakh seized, case registered against two | आखाडा बाळापूरमध्ये दुकानावर छापा: 4.20 लाखांचा सुगंधित जर्दा जप्त, दोघांवर गुन्हा दाखल – Hingoli News
आखाडा बाळापूर येथे एका दुकानावर पोलिसांच्या पथकाने मंगळवारी ता. ६ दुपारी छापा टाकून ४.२० लाखांचा सुगंधित जर्दा जप्त केला आहे. याप्रकरणी दोघांवर आखाडा बाळापूर पोलिस ठाण्यात गुन्हा दाखल झाला आहे.
.
पोलिसांनी दिलेल्या माहितीनुसार, आखाडा बाळापूर येथे एका किराणा दुकानामध्ये शासनाने प्रतिबंधीत केलेला सुगंधित जर्दा साठवणुक केल्याची माहिती पोलिसांना मिळाली होती. त्यावरून नांदेड परिक्षेत्राचे पोलिस उपमहानिरीक्षक शहाजी उमाप, पोलिस अधिक्षक निलभ रोहन यांच्या मार्गदर्शनाखाली पोलिस निरीक्षक विष्णूकांत गुट्ठे, नांदेड येथील सहाय्यक पोलिस निरीक्षक डी. जी. तलेदवार, जमादार शेख अन्सार, शिवाजी पवार, पिराजी बेले, अरविंद जाधव, प्रदीप खानसोळे, संजीव जिंकलवाड, गणेश धुमाळ, कामाजी गवळी यांच्या पथकाने मागील दोन दिवसांपासून एका दुकानावर पाळत ठेवली होती. यामध्ये माहिती खरी असल्याचे स्पष्ट झाल्यानंतर पोलिसांनी छापा टाकण्याची तयारी सुरु होती.
दरम्यान, पोलिसांच्या पथकाने आज दुपारी किराणा दुकानावर छापा टाकला. यावेळी पोलिसांनी दुकानातील पोत्यांची तपासणी केली असता त्यात एका पोत्यात जाफरानी जर्दाचे ९ बॉक्स, दुसऱ्या पोत्यात ४ बॉक्स तसेच तिसऱ्या पोत्यात ७ बॉक्स असा सुमारे ४.२० लाख रुपयांचा जर्दा जप्त केला आहे.
या प्रकरणी जमादार शेख अन्सार यांच्या तक्रारीवरून आखाडा बाळापूर पोलिसांनी सय्यद अहमद अली, गिरीष पिंपरवार (रा. आखाडा बाळापूर) यांच्या विरुध्द गुन्हा दाखल झाला आहे. पोलिस निरीक्षक गुठ्ठे, जमादार शेख अन्सार पुढील तपास करीत आहेत.
