बार्बेक्यूमध्ये कुकिंग ऑइलऐवजी रॉकेल ओतले, महिला भाजली:वाचवताना पतीही भाजला; दार्जिलिंगला हनिमूनसाठी गेले होते जोडपे

[ads1]

पश्चिम बंगालमधील दार्जिलिंगच्या सिटोंग येथे गुरुवारी रात्री एका होमस्टेच्या बार्बेक्यूला आग लागली. या दुर्घटनेत नवविवाहित महिला ६०% भाजली. तिला वाचवण्याचा प्रयत्न करताना तिचा पतीही भाजला. महिलेला उपचारांसाठी सिलीगुडी येथील खासगी रुग्णालयात दाखल करण्यात आले आहे. पोलिसांच्या मते, बार्बेक्यूमध्ये स्वयंपाकाच्या तेलाऐवजी रॉकेल ओतल्याने आग भडकली. कुटुंबीयांनी कुर्सियॉन्ग पोलिस ठाण्यात होमस्टेविरोधात तक्रार दाखल केली आहे. पोलिसांनी तपास सुरू केला आहे, मात्र या प्रकरणात अद्याप कोणालाही अटक करण्यात आलेली नाही. समीर दास यांना प्राथमिक उपचारांनंतर रुग्णालयातून सुट्टी देण्यात आली. मात्र निकिताची प्रकृती गंभीर आहे. सर्वप्रथम पाहा अपघाताची ४ छायाचित्रे… हनिमून साजरा करण्यासाठी दाम्पत्य सिटोंगला गेले होते निकिता आणि समीर हे पश्चिम बंगालमधील उत्तर २४ परगणा जिल्ह्यातील चोपडा येथील रहिवासी आहेत. दोघांनी सुमारे दोन महिन्यांपूर्वी लग्न केले होते. पोलिसांच्या म्हणण्यानुसार, दोघेही अनेक वर्षांपासून रिलेशनशिपमध्ये होते. लग्नानंतर काही दिवसांपूर्वी ते हनिमूनसाठी सिटोंगला पोहोचले होते. होमस्टेच्या सीसीटीव्ही फुटेजमध्ये काहीतरी टाकल्यानंतर बार्बेक्यूची आग वेगाने पसरताना दिसत आहे. त्यानंतर निकिताच्या कपड्यांना आग लागली. फुटेजमध्ये समीर आपला टी-शर्ट काढून निकिताच्या शरीराला लागलेली आग विझवताना दिसत आहेत. तिला वाचवण्याच्या प्रयत्नात ते स्वतःही भाजले. निकिताच्या पतीने आरोप केला की, बार्बेक्यूवर टर्पेंटाइन ऑईल टाकल्यानंतर आग लागली. दरम्यान, होमस्टेचे मालक निहाल अयान यांनी कर्मचाऱ्याचा निष्काळजीपणा मान्य केला आहे. निहाल अयान यांच्या म्हणण्यानुसार, कर्मचाऱ्याने कुकिंग ऑईलऐवजी केरोसीन टाकले होते. कुटुंबीयांनी सुरक्षाव्यवस्थेवर प्रश्न उपस्थित केले कुटुंबीयांनी आरोप केला की, होमस्टेमध्ये सुरक्षेसाठी आवश्यक व्यवस्था नव्हती. घटनेनंतर होमस्टे चालकांनी मदतही केली नाही. निकिताला रुग्णालयात नेण्यासाठी बोलावलेली गाडीही सुमारे ४० मिनिटांनंतर पोहोचली. निकिताला प्रथम जवळच्या रुग्णालयात नेण्यात आले. त्यानंतर तिला सिलीगुडीतील खासगी रुग्णालयात दाखल करण्यात आले. निकिताची प्रकृती गंभीर आहे.

[ads2]