Summer Eye Care | पालकांनो वाढत्या उष्णतेमुळे मुलांच्या डोळ्यांना मोठा धोका; ‘या’ गोष्टींकडे दुर्लक्ष करू नका!
Summer Eye Care | उन्हाळी सुट्ट्या सुरू झाल्यानंतर मुलांचा बाहेर खेळण्याचा वेळ आणि मोबाईल, टीव्ही, टॅब यांचा वापर मोठ्या प्रमाणात वाढतो. वाढत्या तापमानासोबतच तीव्र सूर्यप्रकाश, धूळ आणि स्क्रीन टाइमचा थेट परिणाम मुलांच्या डोळ्यांवर होत असल्याचे तज्ज्ञांनी सांगितले आहे. योग्य काळजी घेतली नाही तर भविष्यात डोळ्यांच्या गंभीर समस्या निर्माण होण्याचा धोका वाढू शकतो.
देशातील अनेक भागांमध्ये तापमान सातत्याने वाढत असून उष्णतेच्या लाटा अधिक तीव्र होत आहेत. अशा परिस्थितीत उन्हात जास्त वेळ घालवणाऱ्या मुलांच्या डोळ्यांवर अतिनील किरणांचा विपरीत परिणाम होऊ शकतो. तज्ज्ञांच्या माहितीनुसार UV-A आणि UV-B किरणांमुळे डोळ्यांच्या बाहेरील भागावर सनबर्नसारखा परिणाम दिसू शकतो. काही वेळा रेटिनालाही धोका निर्माण होण्याची शक्यता असते.
उन्हाळ्यात मुलांमध्ये डोळे लाल होणे, खाज सुटणे, पाणी येणे आणि जळजळ होणे अशा समस्या वाढताना दिसतात. त्यामुळे मुलांना बाहेर पाठवताना टोपी, कॅप, स्कार्फ आणि UV संरक्षण असलेले सनग्लासेस वापरण्याचा सल्ला डॉक्टर देतात. विशेषतः दुपारी 12 ते 4 या वेळेत सूर्याची तीव्रता जास्त असल्याने शक्यतो मुलांना थेट उन्हात जाण्यापासून दूर ठेवावे असेही सांगितले जात आहे.
Summer Eye Care | स्क्रीन टाइम आणि स्विमिंग पूलचा धोका :
सतत एसी किंवा पंख्याखाली राहिल्यामुळे मुलांचे डोळे कोरडे पडण्याच्या तक्रारी वाढतात. त्यामुळे डोळ्यांत खडबडीतपणा, चिडचिड आणि वारंवार डोळे चोळण्याची सवय निर्माण होऊ शकते. काही मुलांमध्ये डोळ्यांच्या अॅलर्जीचाही त्रास वाढतो.
उन्हाळी सुट्ट्यांमध्ये वॉटर पार्क आणि स्विमिंग पूलमध्ये जाणाऱ्यांची संख्या वाढते. मात्र क्लोरीनयुक्त पाणी किंवा अस्वच्छ पूलमुळे कंजंक्टिव्हायटिस, डोळ्यांचे संसर्ग आणि कॉर्नियल इन्फेक्शनचा धोका वाढू शकतो. त्यामुळे पोहताना चांगल्या प्रतीचे स्विमिंग गॉगल्स वापरणे आणि स्वच्छ पूल निवडणे महत्त्वाचे असल्याचे तज्ज्ञांनी स्पष्ट केले आहे.
याशिवाय मोबाईल, टॅब आणि टीव्हीसमोर दीर्घकाळ वेळ घालवल्यामुळे डिजिटल आय स्ट्रेनच्या समस्या वाढत आहेत. स्क्रीनचा अतिवापर केल्याने डोळे कोरडे पडणे, धूसर दिसणे, डोकेदुखी आणि मायोपियाचा धोका निर्माण होऊ शकतो. त्यामुळे पालकांनी मुलांचा स्क्रीन टाइम मर्यादित ठेवून त्यांना मैदानी खेळ, वाचन, कला, संगीत आणि बोर्ड गेम्ससारख्या उपक्रमांकडे वळवण्याचा सल्ला तज्ज्ञांनी दिला आहे.
