ताडोबासह परिसरातील वाघांच्या सुरक्षेवर प्रश्नचिन्ह:बंगळुरू स्थित वन्यजीव छायाचित्रकाराच्या चौकशीने खळबळ

ताडोबा-अंधारी व्याघ्रप्रकल्प आणि परिसरातील काही वाघ बेपत्ता असल्याच्या संशयावरून वन्यजीव वर्तुळात चिंता व्यक्त होत असतानाच, वनविभागाने बंगळुरू येथील एका नामांकित वन्यजीव छायाचित्रकाराची सुरू केलेली चौकशी आता अत्यंत गंभीर वळणावर आली आहे. जंगलात संशयास्पद हालचाली करणे, नियम मोडणे आणि चक्क वाहनातून मृत जनावरांची (मेलेली जनावरे) वाहतूक केल्याच्या संशयावरून वनविभाग या छायाचित्रकाराची कसून चौकशी करत आहे. मिळालेल्या माहितीनुसार, संबंधित छायाचित्रकार ताडोबाच्या बफर आणि कोअर परिसरात आपल्या गाडीतून मेलेली जनावरे आणत असल्याचे व त्यांची वाहतूक करत असल्याचे काही प्रकार समोर आले आहेत. वाघांना आमिष दाखवून विशिष्ट ठिकाणी खेचण्यासाठी किंवा त्यांच्या हालचालींवर नियंत्रण ठेवून छायाचित्रण करण्यासाठी हा मृत जनावरांचा वापर केला जात होता का, यादृष्टीने नागपूर वनविभागाचे वरिष्ठ अधिकारी तपास करत आहेत. व्याघ्रप्रकल्पाच्या हद्दीत बाहेरील वाहनातून अशा प्रकारे मृत जनावरे आणणे आणि त्यांची वाहतूक करणे हा गंभीर वन्यजीव गुन्हा मानला जातो. गेल्या काही महिन्यांपासून ताडोबा परिसरातील काही वाघ पर्यटकांना दिसलेले नाहीत. या पार्श्वभूमीवर, या छायाचित्रकाराच्या या कृत्यांचा आणि वाघांच्या सुरक्षिततेचा काही संबंध आहे का, याचा शोध वनविभाग घेत आहे. जंगलातील या नियमबाह्य हस्तक्षेपामुळे ताडोबातील वाघांच्या अंतर्गत सुरक्षेचा प्रश्न ऐरणीवर आला असून, दोषींवर कडक कारवाई करण्याची मागणी वन्यजीवप्रेमींकडून केली जात आहे. दोषींवर कडक कायदेशीर कारवाई आम्ही या प्रकरणाची अत्यंत गंभीर दखल घेतली असून संबंधित छायाचित्रकाराची वनविभागाकडून कसून चौकशी केली जात आहे. व्याघ्रप्रकल्पाच्या बफर आणि कोअर क्षेत्रात कोणत्याही प्रकारच्या नियमबाह्य हालचाली किंवा प्राण्यांना आमिष दाखवण्याचे प्रकार खपवून घेतले जाणार नाहीत. चौकशीत जे काही तथ्य समोर येईल, त्यानुसार दोषींवर वन्यजीव संरक्षण कायद्यांतर्गत कडक कायदेशीर कारवाई केली जाईल. – प्रभूनाथ शुक्ल, क्षेत्र संचालक, ताडोबा-अंधारी व्याघ्रप्रकल्प