संजय गायकवाडांचं वक्तव्य बेशरमपणाचं:हे सगळं अमित शहांच्या इशाऱ्यावर ठरवून चाललंय, एकनाथ शिंदेंनी महाराष्ट्राची माफी मागावी- राजू शेट्टी

शेतकरी आत्महत्यांसारख्या अत्यंत संवेदनशील विषयावर शिवसेना (शिंदे गट) आमदार संजय गायकवाड यांनी केलेल्या वादग्रस्त वक्तव्याचे आता राज्यभरात तीव्र पडसाद उमटू लागले आहेत. स्वाभिमानी शेतकरी संघटनेचे नेते राजू शेट्टी यांनी गायकवाड यांच्यासह थेट उपमुख्यमंत्री एकनाथ शिंदे आणि केंद्रीय गृहमंत्री अमित शाह यांच्यावर गंभीर आरोप केले आहेत. “गायकवाड यांचे हे वक्तव्य बेशरमपणाचे असून, भीमाशंकरच्या मुद्द्यावरून लक्ष हटवण्यासाठी अमित शाह यांच्या इशाऱ्यावरच हा डाव आखला जात आहे,” असा दावा राजू शेट्टी यांनी केला आहे. ‘अमित शाहांच्या इशाऱ्यावर गायकवाडांना फूस’ संजय गायकवाड यांच्या वादग्रस्त विधानाला राजू शेट्टी यांनी यामागे मोठे राजकीय षड्यंत्र असल्याचे म्हटले आहे. ते म्हणाले, “संजय गायकवाड यांच्यासारखे उतावीळ नेते सातत्याने अशी बेताल वक्तव्ये करतात, यामागे नक्कीच काहीतरी हेतू आहे. शिंदे सेना ही अमित शाह यांच्या इशाऱ्यावर चालते हे सर्वांना माहीत आहे. सध्या भीमाशंकर येथील जंगलतोडीच्या मुद्द्यावरून महाराष्ट्रात गदारोळ सुरू आहे. या मूलभूत प्रश्नावरून जनतेचे लक्ष विचलित करण्यासाठी आणि त्यांना दुसरीकडे गुंतवून ठेवण्यासाठीच अशा बेताल लोकांना फूस देऊन वक्तव्ये करायला लावली जातात, अशी दाट शक्यता आहे.” ‘शिंदेंच्या भूमिकेबद्दल संशय’ गायकवाडांच्या या वक्तव्याची एकनाथ शिंदे यांनी गंभीर दखल घेण्याची मागणी शेट्टी यांनी केली. “जर शिंदेंनी याची दखल घेतली नाही, तर मला त्यांच्याच भूमिकेबद्दल संशय येऊ लागेल. जेव्हा जेव्हा राज्यात मूलभूत प्रश्नांवर जनआंदोलने होतात, तेव्हा गायकवाडांसारखे वाचाळवीर काहीतरी बोलून विषय भलतीकडे नेतात, हा आजवरचा अनुभव आहे,” असे ते म्हणाले. ‘शिंदेंनी महाराष्ट्राची माफी मागावी’ शेट्टी म्हणाले, केंद्र आणि राज्य सरकारच्या धोरणांमुळे तसेच नैसर्गिक आपत्तीमुळे शेतकऱ्यांवर आत्महत्या करण्याची वेळ आली आहे, यात शेतकऱ्याचा दोष नाही. गायकवाडांनी केलेले वक्तव्य बेशरमपणाचे आहे. गायकवाड सोडा, पण त्यांच्या नेत्यांनी केवळ शेतकऱ्यांचीच नव्हे तर संपूर्ण महाराष्ट्राची माफी मागितली पाहिजे, अन्यथा हे सर्व अमित शाहांच्या इशाऱ्यावर चालले आहे, असाच निष्कर्ष महाराष्ट्र काढेल,” असा इशारा त्यांनी दिला. संजय गायकवाड नेमके काय म्हणाले होते? राज्यात शेतकरी आत्महत्यांचा प्रश्न गंभीर होत असताना, संजय गायकवाड यांनी एका कार्यक्रमात धक्कादायक विधान केले होते. “शेतकरी आत्महत्या का करतात? आत्महत्या करणाऱ्या शेतकऱ्यांच्या अंत्यविधीला कोणीही जाऊ नये. आत्महत्या केलेल्या शेतकऱ्यांचे मृतदेह जेव्हा जनावरे खातील, तेव्हा त्यांना त्यांच्या निर्णयाची जाणीव होईल,” असे संतापजनक वक्तव्य त्यांनी केले होते. तसेच, शेतकऱ्यांनी आत्महत्येचा मार्ग न स्वीकारता आमदार-खासदारांकडे मदत मागावी, असेही ते म्हणाले होते. मात्र, त्यांच्या या भाषेमुळे राज्यभरातून तीव्र संताप व्यक्त केला जात आहे. ———— हेही वाचा… हा सरकारचा पराभव, आता राज्याचे नेतृत्व पुन्हा एकनाथ शिंदेंकडे द्या:विधान परिषद निकालानंतर रवींद्र धंगेकरांची मोठी मागणी
विधान परिषद निवडणुकीत महायुतीला बसलेल्या मोठ्या धक्क्यानंतर आता भाजप आणि शिवसेना (शिंदे गट) यांच्यात आरोप-प्रत्यारोपांच्या फैरी झडत आहेत. भाजपने “शिवसेनेने युतीधर्म पाळला नाही, अन्यथा पाचही जागा जिंकलो असतो” असा आरोप केल्यानंतर, आता शिवसेनेचे नेते रवींद्र धंगेकर यांनी भाजपवर पलटवार केला आहे. तसेच, या निकालानंतर समन्वय साधण्यासाठी राज्याचे नेतृत्व पुन्हा एकदा एकनाथ शिंदे यांच्याकडे दिले पाहिजे, अशी मागणीही त्यांनी केली आहे. सविस्तर वाचा