उद्योगमंत्री उदय सामंत यांची अनाथालयाला भेट:संस्थेचे सामाजिक, शैक्षणिक, संस्कारक्षम कामकाज जाणून घेतले
प्रतिनिधी | टाकळी जिवरग उद्योगमंत्री उदय सामंत यांनी निल्लोड फाटा येथील श्री माऊली वारकरी गुरुकुल आश्रम अनाथालय तथा संत ज्ञानेश्वर विद्यालयाला सदिच्छा भेट दिली. संस्थेचे सामाजिक, शैक्षणिक, संस्कारक्षम कामकाज त्यांनी जाणून घेतले. वारकरी संप्रदायाच्या संस्कारातून अनाथ, सर्वसामान्य कुटुंबातील विद्यार्थ्यांचे जीवन घडविण्याचे काम संस्था करत आहे. या उपक्रमाबद्दल सामंत यांनी समाधान व्यक्त केले. संस्थापक अध्यक्ष रामेश्वर महाराज पवार यांनी सामंत यांचा शाल, श्रीफळ देऊन सत्कार केला. सामंत यांनी आश्रमातील वारकरी विद्यार्थ्यांशी संवाद साधला. संस्थेमार्फत सुरू असलेले वारकरी परंपरेतील संस्कारयुक्त शिक्षण, अनाथ बालकांच्या पुनर्वसनाचे काम पवित्र आहे. समाजासाठी प्रेरणादायी आहे. शासनस्तरावरून आवश्यक ते सर्वतोपरी सहकार्य करू, अशी ग्वाही सामंत यांनी दिली. या वेळी शनेश्वर प्रतिष्ठान, सिल्लोडचे १००८ महामंडलेश्वर शनिउपासक मंगरूळकर शास्त्री महाराज, श्री ज्ञानेश्वर माऊली वारकरी शिक्षण संस्था, केऱ्हाळा येथील अध्यक्ष देवदास महाराज मिसाळ, शिवसेना नेते नंदूभाऊ सहारे, वारकरी, विद्यार्थी, शालेय कर्मचारी उपस्थित होते.
