Share Market Crash | शेअर बाजारात मोठी पडझड! सेन्सेक्स-निफ्टी पुन्हा घसरले, ‘इतक्या’ कोटींचे नुकसान
Share Market Crash | भारतीय शेअर बाजारात मंगळवारी पुन्हा एकदा मोठी घसरण पाहायला मिळाली. जागतिक तणाव आणि कच्च्या तेलाच्या वाढत्या किंमतींच्या पार्श्वभूमीवर गुंतवणूकदारांमध्ये भीतीचे वातावरण निर्माण झाले आहे. त्यामुळे आठवड्याच्या सुरुवातीलाच सेन्सेक्स आणि निफ्टीमध्ये जवळपास 1 टक्क्यांची घसरण नोंदवण्यात आली. या घसरणीमुळे काही मिनिटांतच बाजारातील सूचीबद्ध कंपन्यांचे एकूण बाजारमूल्य सुमारे 4.24 लाख कोटी रुपयांनी घटले.
मंगळवारी सकाळच्या सत्रात सेन्सेक्स 1.05 टक्क्यांनी घसरून 73,326.61 अंकांवर पोहोचला, तर निफ्टी 50 जवळपास 0.9 टक्क्यांनी घसरून 22,771.75 अंकांवर आला. केवळ मोठ्या कंपन्यांच्याच नव्हे तर मिडकॅप आणि स्मॉलकॅप निर्देशांकांमध्येही जवळपास 1 टक्क्यांची घसरण झाली. त्यामुळे गुंतवणूकदारांचे मोठ्या प्रमाणात नुकसान झाल्याचे चित्र दिसून आले. (Indian Stock Market News)
शेअर बाजाराच्या सुरुवातीच्या घसरणीत काही प्रमुख कंपन्यांच्या शेअर्सना मोठा फटका बसला. इंडिगो, झोमॅटोची पॅरेंट कंपनी ‘इटर्नल’, महिंद्रा अँड महिंद्रा, स्टेट बँक ऑफ इंडिया, अॅक्सिस बँक आणि एशियन पेंट्स या कंपन्यांच्या शेअर्समध्ये 2 ते 3 टक्क्यांची घसरण झाली. यामुळे गुंतवणूकदारांमध्ये चिंतेचे वातावरण निर्माण झाले.
दरम्यान काही आयटी आणि वित्तीय क्षेत्रातील शेअर्स तुलनेने स्थिर राहिले. बजाज फायनान्स, टेक महिंद्रा, एचसीएल टेक आणि आयटीसी या कंपन्यांच्या शेअर्समध्ये फारसा घसरणीचा परिणाम दिसून आला नाही. काही शेअर्समध्ये किंचित वाढही नोंदवली गेली.
Share Market Crash | आखाती तणाव आणि तेलाच्या किंमतींचा परिणाम :
जागतिक पातळीवर वाढत असलेल्या तणावामुळेही बाजारावर मोठा परिणाम झाला आहे. विशेषतः इराण आणि अमेरिकेदरम्यान वाढलेल्या तणावामुळे गुंतवणूकदारांमध्ये अनिश्चितता वाढली आहे. या परिस्थितीचा परिणाम थेट जागतिक बाजारांवर आणि त्यानंतर भारतीय शेअर बाजारावर होताना दिसत आहे.
त्याचबरोबर कच्च्या तेलाच्या किंमतीत झालेल्या वाढीनेही बाजारातील घसरण अधिक तीव्र केली. आंतरराष्ट्रीय बाजारात तेलाच्या किंमती प्रति बॅरल 110 डॉलरपर्यंत पोहोचल्या आहेत. होर्मुज समुद्रधुनीतील तणावामुळे तेल पुरवठ्यावर परिणाम होण्याची भीती व्यक्त केली जात आहे. त्यामुळे गुंतवणूकदारांनी सावध भूमिका घेतल्याचे दिसून येत आहे. (Share Market Crash)
याच पार्श्वभूमीवर एनएसईवरील सेक्टोरल निर्देशांकांमध्ये निफ्टी ऑटो इंडेक्सला सर्वाधिक फटका बसला असून त्यात 2 टक्क्यांहून अधिक घसरण झाली. तसेच निफ्टी पीएसयू बँक निर्देशांकातही सुमारे 1.9 टक्क्यांची घसरण नोंदवली गेली. मात्र निफ्टी मेटल इंडेक्समध्ये 0.7 टक्क्यांची वाढ दिसून आली. बाजारातील अस्थिरतेचे संकेत देणारा इंडिया VIX निर्देशांक जवळपास 2 टक्क्यांनी वाढला असून गुंतवणूकदारांमध्ये भीतीचे वातावरण कायम असल्याचे चित्र दिसत आहे.
