‘लालपरी’ होणार हायटेक; 200 व्होल्वो बसेस:डिजिटल बुकिंग आणि हॉस्पिटॅलिटी सेवाही; प्रताप सरनाईकांची मोठी घोषणा

[ads1]

महाराष्ट्राच्या ग्रामीण भागापासून शहरांपर्यंत सर्वसामान्य प्रवाशांची विश्वासार्ह लोकवाहिनी असलेल्या महाराष्ट्र राज्य मार्ग परिवहन महामंडळाने (एसटी) आता लांब पल्ल्याच्या आरामदायी प्रवासी सेवेत मोठी झेप घेण्याची तयारी केली आहे. खासगी आराम बससेवांकडे वळणाऱ्या प्रवाशांना पुन्हा एसटीकडे आकर्षित करण्यासाठी महामंडळाच्या ताफ्यात लवकरच स्वमालकीच्या 200 अत्याधुनिक, वातानुकूलित व्होल्वो बसेस दाखल करण्यात येणार आहेत. यामध्ये 170 आसनी आणि 30 शयनयान बसेसचा समावेश असणार आहे. सुरक्षितता, आरामदायीपणा, आधुनिक तंत्रज्ञान आणि दर्जेदार प्रवासी सेवेवर या नव्या बससेवेत भर दिला जाणार आहे. परिवहन मंत्री तथा एसटी महामंडळाचे अध्यक्ष प्रताप सरनाईक यांनी याबाबत माहिती दिली. एसटीच्या इतिहासात पहिल्यांदाच एवढ्या मोठ्या प्रमाणात स्वमालकीच्या व्होल्वो बसेस ताफ्यात समाविष्ट करण्याची तयारी सुरू आहे. त्यामुळे ‘लालपरी’च्या पारंपरिक सेवेला आधुनिक आराम बससेवेची जोड मिळणार आहे. खासगी आराम बससेवेला एसटीचा पर्याय लांब पल्ल्याच्या प्रवासासाठी सध्या मोठ्या संख्येने प्रवासी अधिक भाडे देऊन खासगी आराम बससेवेला पसंती देतात. वातानुकूलित सुविधा, आरामदायी आसनव्यवस्था, कमी प्रवास वेळ, रात्रीच्या प्रवासासाठी शयनयानाची सुविधा आणि विविध डिजिटल सुविधा यामुळे खासगी आराम बससेवेचा स्वतंत्र प्रवासी वर्ग तयार झाला आहे. या पार्श्वभूमीवर एसटीने केवळ स्वस्त प्रवासाचा पर्याय देण्याऐवजी आराम, सुरक्षितता आणि आधुनिक सुविधांच्या बाबतीतही प्रवाशांच्या अपेक्षा पूर्ण करण्याचे उद्दिष्ट ठेवले आहे. खासगी आराम बससेवेच्या तोडीची सेवा एसटीच्या माध्यमातून उपलब्ध करून देण्याचा प्रयत्न केला जाणार आहे. दिवसा 45 आसनी, रात्री शयनयानाची सुविधा नव्या बससेवेत प्रवासाच्या वेळेनुसार वेगवेगळे पर्याय उपलब्ध करून देण्यात येणार आहेत. 250 किलोमीटरपेक्षा अधिक अंतराच्या आणि साधारण 5 ते 6 तासांच्या प्रवासासाठी 45 आसनी आरामदायी बसेस उपलब्ध करून देण्यात येणार आहेत. तर रात्रीच्या लांब पल्ल्याच्या प्रवासासाठी 30 किंवा 45 शयनयान क्षमतेच्या बसेस उपलब्ध करून देण्याची योजना आहे. त्यामुळे दिवसा प्रवास करणाऱ्या तसेच रात्री आरामात प्रवास करू इच्छिणाऱ्या प्रवाशांना त्यांच्या गरजेनुसार पर्याय मिळणार आहे. मोबाईलवरून घरबसल्या तिकीट बुकिंग नव्या व्होल्वो बससेवेचे आणखी एक महत्त्वाचे वैशिष्ट्य म्हणजे डिजिटल आरक्षण व्यवस्था. एसटीच्या अधिकृत ऑनलाइन आरक्षण प्रणालीसोबतच खासगी डिजिटल ट्रॅव्हल प्लॅटफॉर्मवरूनही तिकीट आरक्षित करण्याची सुविधा उपलब्ध करून देण्याचा महामंडळाचा मानस आहे. यामुळे प्रवाशांना बसस्थानकावर जाऊन तिकीट काढण्याची गरज राहणार नाही. मोबाईलवरून बसची वेळ, मार्ग आणि उपलब्ध आसनांची माहिती घेता येईल. त्यानंतर घरबसल्या तिकीट आरक्षित करता येणार आहे. डिजिटल तिकीट प्रणालीमुळे एसटीची आराम बससेवा आधुनिक प्रवासी वाहतूक व्यवस्थेशी जोडण्याचा प्रयत्न केला जाणार आहे. खासगी संस्थेकडून आतिथ्य व्यवस्थापन एसटीच्या नव्या व्होल्वो बससेवेत केवळ अत्याधुनिक बस उपलब्ध करून देण्यावर भर नसून प्रवाशांना दर्जेदार आतिथ्यसेवेचा अनुभव देण्याचीही योजना आहे. यासाठी खासगी संस्थेची मदत घेऊन आतिथ्य व्यवस्थापन करण्याचा विचार आहे. प्रवाशांचे स्वागत, बसमधील मूलभूत सुविधा, स्वच्छता, प्रवाशांना आवश्यक माहिती तसेच विविध सेवा-सुविधांचे व्यवस्थापन करण्यासाठी प्रशिक्षित मनुष्यबळाचा वापर केला जाणार आहे. त्यामुळे एसटीच्या पारंपरिक प्रवासी सेवेला हॉस्पिटॅलिटी आणि ग्राहकसेवेची आधुनिक जोड मिळणार आहे. मागणी असलेल्या मार्गांचे सर्वेक्षण नव्या बसेस कोणत्या मार्गांवर सुरू करायच्या, यासाठी महामंडळाकडून व्यापक अभ्यास करण्यात येणार आहे. महाराष्ट्रातील तसेच आंतरराज्य मार्गांवर खासगी आराम बससेवेला मोठी मागणी असलेल्या मार्गांचा सर्वंकष अभ्यास केला जाणार आहे. या अभ्यासामध्ये प्रवाशांची संख्या, प्रवासाची मागणी, सध्या उपलब्ध असलेल्या बससेवा, मार्गाचे अंतर, प्रवासाचा कालावधी आणि आर्थिक व्यवहार्यता यांचा विचार केला जाणार आहे. त्यानंतर प्रवाशांची मागणी आणि व्यवहार्यता लक्षात घेऊन व्होल्वो आणि शयनयान बसेसचे मार्ग निश्चित केले जातील. एसटीच्या पारंपरिक जाळ्याला आधुनिक सुविधांची जोड एसटी महामंडळाचे सर्वात मोठे वैशिष्ट्य म्हणजे महाराष्ट्राच्या कानाकोपऱ्यात पोहोचलेले त्याचे विस्तृत बससेवेचे जाळे. ग्रामीण भागातील छोट्या गावांपासून मोठ्या शहरांपर्यंत एसटीची सेवा उपलब्ध आहे. या व्यापक नेटवर्कला आधुनिक आराम बससेवेची जोड देण्याचा प्रयत्न नव्या व्होल्वो बसेसच्या माध्यमातून केला जाणार आहे. एसटीच्या मते, प्रवाशांचा विश्वास ही महामंडळाची मोठी ताकद आहे. या विश्वासासोबत आधुनिक सुविधा, डिजिटल आरक्षण आणि दर्जेदार आतिथ्यसेवा उपलब्ध करून देत लांब पल्ल्याच्या प्रवासी सेवेत नवे मानदंड निर्माण करण्याचा प्रयत्न केला जाणार आहे. ‘लालपरी’चा नवा आरामदायी प्रवास एसटीची ओळख आजवर प्रामुख्याने सर्वसामान्य आणि ग्रामीण भागातील प्रवाशांची वाहतूक करणारी बससेवा अशी राहिली आहे. मात्र, बदलत्या प्रवासी गरजा आणि खासगी आराम बससेवेतील वाढती स्पर्धा लक्षात घेऊन एसटीने आपल्या सेवेत आधुनिक बदल करण्याची तयारी केली आहे. 200 वातानुकूलित व्होल्वो बसेस, शयनयान सेवा, डिजिटल तिकीट आरक्षण, मागणी असलेल्या मार्गांची निवड आणि खासगी संस्थेच्या माध्यमातून आतिथ्य व्यवस्थापन यामुळे एसटीच्या लांब पल्ल्याच्या प्रवासी सेवेला नवे स्वरूप मिळण्याची शक्यता आहे. परिवहन मंत्री प्रताप सरनाईक यांच्या माहितीनुसार, ‘प्रवाशांच्या सेवेसाठी’ हे एसटीचे घोषवाक्य अधिक व्यापक आणि आधुनिक स्वरूपात प्रत्यक्षात आणण्याच्या दिशेने हा महत्त्वाचा टप्पा आहे. सुरक्षित, आरामदायी, विश्वासार्ह आणि डिजिटल सुविधा असलेला प्रवास उपलब्ध करून देत ‘लालपरी’ला लांब पल्ल्याच्या आराम बससेवेच्या क्षेत्रात नव्या रूपात उभे करण्याचा महामंडळाचा प्रयत्न आहे. हेही वाचा.. IIT मुंबई आत्महत्या प्रकरण:जातीयवादी अपशब्द वापरत तीन महिने मानसिक छळ केल्याचा साहिलच्या वडिलांचा आरोप, प्राध्यापकाविरोधात FIR दाखल आयआयटी मुंबईचा विद्यार्थी साहिल रवींद्र वाकोडे याच्या आत्महत्येप्रकरणी प्राध्यापक सूर्यनारायण डल्ला यांच्या विरोधात एफआयआर दाखल करण्यात आला आहे. पोलिसांनी या प्रकरणात अनुसूचित जाती/जमाती (SC/ST) कायद्याच्या कलमांनुसार गुन्हा नोंदवला असून, सध्या मुंबई गुन्हे शाखेकडून या संपूर्ण प्रकरणाचा सखोल तपास केला जात आहे. सविस्तर वाचा…

[ads2]