संख्याबळ वाढवून एकनाथ शिंदेंना पुन्हा मुख्यमंत्री करू!:हीच जनतेची इच्छा म्हणत दसऱ्याच्या दिवशी परिवहन मंत्री प्रताप सरनाईक यांचा राजकीय बॉम्ब

“महाराष्ट्राच्या कानाकोपऱ्यातील सामान्य जनतेला आणि प्रत्येक शिवसैनिकाला एकनाथ शिंदे पुन्हा एकदा राज्याचे मुख्यमंत्री व्हावेत असेच मनापासून वाटते. मुख्यमंत्रिपदासाठी सभागृहातील संख्याबळ अत्यंत महत्त्वाचे असते. आज आमच्याकडे आवश्यक ते संख्याबळ थोडे कमी असल्याने एकनाथ शिंदे साहेब उपमुख्यमंत्री पदावर आहेत; मात्र आगामी विधानसभा निवडणुकांत शिवसेनेचे संख्याबळ मोठ्या प्रमाणावर वाढवून शिंदेंना पुन्हा एकदा महाराष्ट्राच्या मुख्यमंत्रिपदी विराजमान करू आणि जनतेची इच्छा पूर्ण करू,” असा मोठा राजकीय बॉम्ब परिवहन मंत्री प्रताप सरनाईक यांनी टाकला आहे. विजयादशमीच्या (दसरा) पूर्वसंध्येला ठाण्यात माध्यमांशी संवाद साधताना प्रताप सरनाईक यांनी पक्षाची आगामी राजकीय दिशा स्पष्ट केली. तसेच राज्यातील दुष्काळी परिस्थिती, शिवसेनेचा दसरा मेळावा, ठाण्यातील प्रदीप पुर्णेकर हत्या प्रकरण, अभिनेता टायगर श्रॉफवरील गोळीबार, पत्रकारांवरील हल्ले आणि आमदार जितेंद्र आव्हाड यांना येणाऱ्या धमक्यांवर त्यांनी सविस्तर व रोखठोक भूमिका मांडली. मेळाव्यात गर्दी करण्यापेक्षा दुष्काळग्रस्त शेतकऱ्यांच्या बांधावर जा! राज्यातील दुष्काळी परिस्थितीवर बोलताना प्रताप सरनाईक म्हणाले, “काश्मीर असो, केरळचा पूर असो वा कोल्हापूरची आपत्ती; संकटात सापडलेल्या जनतेच्या मदतीसाठी सर्वप्रथम धावणारा एकमेव नेता म्हणजे एकनाथ शिंदे आहेत. आज संपूर्ण महाराष्ट्र दुष्काळाच्या भीषण सावटाखाली आहे. त्यामुळे दसरा मेळाव्याच्या नावाखाली शक्तीप्रदर्शन किंवा गर्दी करण्यापेक्षा शिवसैनिकांनी थेट शेतकऱ्यांच्या बांधावर जाऊन स्वखर्चातून मदत करावी, असे थेट आवाहन शिंदे साहेबांनी केले आहे.” शिवसेनेकडून मदतीचा ओघ “एकनाथ शिंदे यांच्या सूचनेनुसार शिवसेना आणि शिवसैनिक आपल्या स्वतःच्या खर्चातून राज्यातील दुष्काळग्रस्तांना अन्नधान्य, पाणी आणि आर्थिक साहाय्य पोहोचवत आहेत. त्यामुळे यंदाचा दसरा मेळावा कोणत्याही भपक्याशिवाय अत्यंत साधेपणाने आणि सामाजिक बांधिलकी जपत साजरा केला जात आहे.” पुर्णेकरांच्या मारेकऱ्यांना भर चौकात फाशी द्या ठाण्यातील राजकीय कार्यकर्ते प्रदीप पुर्णेकर यांच्या हत्येवरून विरोधकांनी एकनाथ शिंदे यांच्यावर केलेल्या आरोपांचा सरनाईक यांनी समाचार घेतला. “प्रदीप पुर्णेकर यांची हत्या अतिशय निर्घृण असून ठाणेकरांनी त्याचा तीव्र निषेध केला आहे. ही घटना घडली तेव्हा एकनाथ शिंदे साहेब शासकीय दौऱ्यावर होते, ठाण्यात नव्हते. मात्र, विरोधकांनी या दुर्दैवी हत्येचेही घाणेरडे राजकारण करत थेट शिंदे साहेबांना लक्ष्य केले.” कुटुंबीयांचे सांत्वन आणि कायदेशीर मदत “घटना संवेदनशील असल्याने आम्ही काही दिवस संयम बाळगला. त्यानंतर स्वतः शिंदे साहेबांच्या आदेशानुसार मी पुर्णेकर यांच्या घरी गेलो, कुटुंबीयांचे सांत्वन केले. पुर्णेकर यांच्या मुलाशी एकनाथ शिंदे यांचे फोनवरून थेट बोलणे करून दिले. या खटल्यासाठी सर्वोत्तम वकिलांची फौज आणि आवश्यक ती सर्व मदत शिवसेना पुर्णेकर कुटुंबीयांना देईल.” टायगर श्रॉफ आणि फिल्म इंडस्ट्रीचे संरक्षण “टायगर श्रॉफच्या घराजवळ गोळीबार झाला तेव्हा उपमुख्यमंत्री मुंबईतच उपस्थित होते. बॉलिवूड ही देशातील एक मोठी रोजगार देणारी इंडस्ट्री असून कलाकारांमध्ये सुरक्षेची भावना निर्माण करणे हे शासनाचे कर्तव्य आहे. त्यामुळे ते तातडीने तिथे पोहोचले. पुर्णेकरांचे मारेकरी असोत किंवा सेलिब्रिटींवर गोळ्या झाडणारे गँगस्टर्स; 1990 च्या दशकाप्रमाणे अशा गुंडांचे एन्काउंटर केले पाहिजे, हीच सामान्य जनतेची भावना आहे.” पत्रकारांवर हल्ला करणाऱ्या 16 नगरसेवकांवर कारवाई करा! पत्रकारांवरील वाढत्या हल्ल्यांवर बोलताना त्यांनी कठोर भूमिका घेतली. “ठाण्यात महापौरांच्या वाहनचालकाने पत्रकाराला मारहाण केल्याची घटना असो वा मीरा-भाईंदर महापालिकेत 16 नगरसेवकांनी 10 ते 12 पत्रकारांना केलेली मारहाण असो; कायदा हातात घेणाऱ्या कोणाचीही गय केली जाणार नाही. मीरा-भाईंदरमधील दोषी नगरसेवकांची पदे तात्काळ रद्द करून त्यांच्यावर गुन्हे दाखल करावेत, अशी मागणी मी स्वतः राज्यपाल आणि मुख्यमंत्र्यांकडे केली आहे.” आव्हाडांनाच वारंवार धमक्या का येतात? राष्ट्रवादी काँग्रेस (शरदचंद्र पवार) पक्षाचे आमदार जितेंद्र आव्हाड यांना मिळणाऱ्या धमक्यांवर विचारले असता सरनाईक म्हणाले, “जितेंद्र आव्हाड आणि मी 2009, 2014, 2019 आणि 2024 अशा सलग 4 निवडणुकांमध्ये एकत्र आमदार झालो. आज मी राज्याचा मंत्री आहे, तरी मला कधी धमकी येत नाही; मात्र आव्हाडांना तीन हात नाक्यावर राहत असल्यापासून वारंवार धमक्या का येतात, याचे आत्मपरीक्षण त्यांनीही केले पाहिजे आणि पोलिसांनी या संपूर्ण प्रकरणाची सखोल चौकशी केली पाहिजे.” सुरक्षेत वाढ करण्याची मागणी “जर आव्हाडांना खरोखरच जीविताला धोका असेल, तर पोलिसांनी त्यांच्या सुरक्षेत तात्काळ वाढ करावी. गरज भासल्यास त्यांची ‘वाय’ (Y) दर्जाची सुरक्षा वाढवून त्यांना ‘झेड’ (Z) दर्जाचे सुरक्षा कवच दिले पाहिजे; कारण ठाण्याला आणि महाराष्ट्राला जितेंद्र आव्हाडांसारख्या नेतृत्वाची भविष्यात गरज आहे,” असे सरनाईक यांनी स्पष्ट केले. बाळासाहेबांचे हिंदुत्व पुढे नेणारी खरी शिवसेना एकनाथ शिंदेंचीच! दसरा मेळाव्याच्या पार्श्वभूमीवर शिवसेनेच्या अस्तित्वावर बोलताना त्यांनी उद्धव ठाकरे यांच्यावर निशाणा साधला. “संजय राऊत म्हणतात की शिवसेना एकच आहे, त्यांच्या या विधानाशी मी सहमत आहे. शिवसेनाप्रमुख बाळासाहेब ठाकरे आणि धर्मवीर आनंद दिघे यांच्या प्रखर हिंदुत्वाचा विचार पुढे नेणारी खरी शिवसेना एकच असून तिचे नेतृत्व एकनाथ शिंदे करत आहेत. ज्या क्षणी तुम्ही सत्तेसाठी काँग्रेस आणि राष्ट्रवादीच्या मांडीवर जाऊन बसलात, त्याच क्षणी तुम्ही बाळासाहेबांच्या विचारांना मूठमाती दिली होती,” असा टोला प्रताप सरनाईक यांनी शेवटी लगावला. ——————————————- हेही वाचा… सत्तेचा अमरपट्टा जनतेच्या हाती, देश मोदींच्याच पाठीशी!: मविआच्या काळात वाझेंच्या आडून माफियागिरी चालवली- नवनाथ बन सत्तेचा अमरपट्टा हा जनतेच्या हाती असतो आणि जनता नरेंद्र मोदी आणि भाजपच्या पाठीशी आहे. मविआचे सरकार असताना ते 25 वर्षे जाणार नाही असे छाती ठोकपणे सांगणारे तुम्ही या जनतेने तुम्हाला अडीच वर्षे सुद्धा ठेवले नाही, तुम्ही 25 वर्षांच्या गप्पा करू नका. पंतप्रधान नरेंद्र मोदी हे कायम देश प्रथम म्हणून काम करत असतात, त्यामुळे त्यांना हटवण्याच्या गप्पा राऊतांनी करू नये. स्वत:च्या पक्षाचे काय झाले, उद्धव ठाकरेंची अवस्था झाली ते बघायला हवे, असे भाजप प्रवक्ते नवनाथ बन यांनी म्हटले आहे. येथे वाचा संपूर्ण बातमी