पुणे शहरातील मार्केटयार्ड परिसरात शुक्रवारी रात्री पूर्ववैमनस्यातून एका तरुणावर पिस्तुलातून गोळीबार करण्यात आला. या घटनेत मोझेस शेकापुरे उर्फ मोझ्या (वय २२) हा तरुण गंभीर जखमी झाला आहे. गुलटेकडीतील मीनाताई ठाकरे वसाहत परिसरातील दोन टोळ्यांमधील वर्चस्वातून हा गोळीबार झाल्याचे तपासात उघड झाले आहे. या प्रकरणी बालाजी उमाप, राम उमाप यांच्यासह सात ते आठ जणांविरुद्ध खुनाचा प्रयत्न केल्याचा गुन्हा दाखल करण्यात आला आहे. आरोपींचा शोध पोलीस घेत आहेत. आठवड्यापूर्वी गुलटेकडीत अल्पवयीनांनी पिस्तुलातून गोळीबार करून दहशत माजविल्याची घटना घडली होती. पोलिसांनी दिलेल्या माहितीनुसार, गुलटेकडीतील मीनाताई ठाकरे वसाहतीत उमाप टोळी आणि अमित शेकापुरे यांच्यात वर्चस्वातून जुना वाद आहे. गोळीबाराच्या दिवशी, शुक्रवारी दुपारी बालाजी उमाप आणि अमित शेकापुरे यांच्यात वाद झाला होता. शुक्रवारी (६ मार्च) रात्री साडेअकराच्या सुमारास अमित शेकापुरे याचा भाऊ मोझेस आणि त्याचा मित्र दुचाकीवरून मार्केट यार्डातील वखार महामंडळाकडून गंगाधाम चौकाकडे जात होते. त्याचवेळी त्यांच्या मागावर असलेले आरोपी बालाजी उमाप, राम उमाप आणि त्यांचे चार ते पाच साथीदार दुचाकीवरून आले. त्यांनी मोझेस आणि त्याच्या मित्राला अडवले. हल्लेखोरांपैकी उमाप याने पिस्तुलातून गोळीबार केला. ही गोळी शेकापुरे याच्या पाठीत लागल्याने तो गंभीर जखमी झाला. घटनेची माहिती मिळताच पोलिसांनी तात्काळ घटनास्थळी धाव घेतली आणि जखमी शेकापुरेला रुग्णालयात दाखल केले. तपासात असे समोर आले आहे की, हल्लेखोरांना शेकापुरे याच्याबरोबर असलेल्या मित्रावर गोळीबार करायचा होता, मात्र गोळी शेकापुरेला लागली. वरिष्ठ पोलीस निरीक्षक विश्वजीत जगताप यांच्या मार्गदर्शनाखाली या प्रकरणाचा पुढील तपास सुरू आहे.
गुलटेकडीतील वर्चस्वाच्या वादातून थरार:दोन टोळ्यांच्या संघर्षात तरुणावर गोळीबार, गंभीर जखमी; पुण्यातील मार्केटयार्डातील घटना
