अमरावतीतील रस्त्यांवर बांधकाम साहित्य; वाहतुकीला अडथळा, अपघाताचा धोका:नागरिक त्रस्त, अर्धे रस्ते व्यापले; मनपाकडे कारवाईची मागणी

अमरावती शहरातील अनेक रस्त्यांवर बांधकाम साहित्य पडून आहे. यामुळे वाहतूक कोंडी होत असून अपघाताचा धोका वाढला आहे. नागरिकांच्या दैनंदिन प्रवासात मोठ्या अडचणी येत आहेत. खाजगी बांधकामांचे वाळू, गिट्टी, विटा, सिमेंट, लोखंडी सळई थेट रस्त्यावर टाकली जात आहे. राजकमल चौक ते इर्विन चौक, बडनेरा रोड, दस्तूर नगर, विलास नगर, शेगाव नाका या भागांत अर्धे रस्ते व्यापले आहेत. यामुळे दुचाकीस्वार, पादचाऱ्यांना जीव मुठीत धरून चालावे लागते. रात्री अनेक छोटे अपघात घडले आहेत. शालेय बसेस आणि रुग्णवाहिकांनाही या अडथळ्यामुळे उशीर होतो. नागरिकांनी महापालिकेकडे तक्रार केली आहे. नियमानुसार, बांधकाम साहित्य रस्त्यावर ठेवण्यास परवानगी नाही. अजय शर्मा यांनी मनपाने त्वरित सर्वेक्षण करून मालकांवर दंडात्मक कारवाईची मागणी केली आहे.